АНУ-ын Мэриленд мужийн Frederick хотод байрлах InventWood компани молекулын түвшинд боловсруулсан шинэ төрлийн инженерчлэлтэй модон материал болох "Superwood"-ийг үйлдвэрлэж эхлэхээр төлөвлөж байна. Энэхүү материал нь гангаас ч бат бөх, галд тэсвэртэй, хөнгөн бөгөөд байгаль орчинд ээлтэйгээр бүтээгджээ.

2018 онд Мэрилендийн их сургуулийн судлаач, инженер Лианбин Хүгийн удирдлага дор энэхүү материалыг боловсруулсан бөгөөд модны эсийн бүтцэд химийн боловсруулалт хийж, шахах аргаар бэхжүүлсэн. Үүний үр дүнд Superwood нь гангаас 50%-иар илүү суналтын бат бэхтэй бөгөөд 10 дахин хөнгөн аж.

Уг материалыг 2025 оны гуравдугаар улиралд Frederick хотод байрлах үйлдвэрээс анхны үйлдвэрлэлийг эхлүүлэхээр төлөвлөжээ. Энэхүү үйлдвэр нь жилд 1 сая хавтгай дөрвөлжин фут үйлдвэрлэх хүчин чадалтай бөгөөд АНУ-ын ойгоос хариуцлагатайгаар мод бэлгэж, дотоодын үйлдвэрлэлийг дэмжихээ мэдэгдээд байна.

Superwood нь байгаль орчинд ээлтэй, дахин боловсруулж болохуйц материал бөгөөд нүүрстөрөгчийг хадгалдаг байна. Энэхүү материал нь барилгын салбарт шинэ эрин үеийг авчрах боломжтой гэж тус компани албан ёсны мэдэгдэлдээ дурьджээ.