Сүүлийн хэдэн арван жилийн турш Арабын Нэгдсэн Эмират Улсад явагдсан хурдацтай хотжилт, үл тасрах бүтээн байгуулалт хуучны барилга байгууламжуудыг аажмаар шахан гаргасаар байна. 

Шинэ тансаг хорооллууд сүндэрлэж, өнгө төрхөө өөрчилж буй хотын цаана өнгөрсөн цаг үеийн дурсамж бүхий архитектурууд нэг нэгээрээ алга болсоор байгааг гэрэл зурагчин Хуссейн АлМоосави анзаарч, нэгэн чимээгүй хувьсгалыг эхлүүлжээ. Барилгын инженер, хот төлөвлөлтийн чиглэлээр мэргэшсэн тэрээр Эмиратын орчин үеийн архитектурын өвийг хадгалах зорилготойгоор судалгаа, баримтжуулалтын ажлыг эхлүүлсэн байна.

Түүний гол зорилго нь 1970-1980 оны үед баригдсан, аж үйлдвэрийн бүс болон хуучны орон сууцны байруудын фасадыг гэрэл зурагт буулган, нийт 2000 барилгын өнгө төрхийг архивлах явдал. Тэрээр тухайн үеийн архитектурын онцлог болох гүнзгий таталттай тагт, геометрийн хэмнэл, агааржуулалтын систем, нутгийн барилгын өвөрмөц шийдлүүдийг онцлон харуулж байна.

АлМоосавигийн үзэж буйгаар эдгээр бүтэц, барилгуудыг өнөөдөр зөвхөн эдийн засгийн үр ашиг, ашиглалтаар биш, харин түүхэн болон соёлын үнэт зүйлсийн үүднээс үнэлж, хадгалах ёстой.

Түүний ажил зөвхөн өнгөрсөн үеийг архивлах төдий биш. Тэрээр олон нийтэд нээлттэй, харилцан мэдээлэл солилцох боломжтой цахим платформ байгуулахаар зорьж буй бөгөөд энэ нь хотын өнгө төрхийг дахин шинээр харах, таних, үнэлэх боломжийг хүмүүст олгоно гэж үзэж байна.