Монгол улсад анх удаа Ногоон барилгын BestGER үнэлгээний аргачлалыг Монголын Ногоон Барилгын Хүрээлэнгээс боловсруулж, 2024 оны 12 сард Хот Байгуулалт, Барилга, Орон Сууцжуулалтын Яамнаас баталсан билээ. Уг аргачлалын дагуу амины орон сууцад үнэлгээ хийж, баталгаажуулах эрх бүхий “Ногоон барилгын хялбаршуулсан төрлийн аудиторууд” 2025 оны 6 дугаар сарын 27-ны өдөр гэрчилгээгээ гардан авлаа. 

Эдгээр мэргэжилтүүд нь ногоон барилгын онолын мэдлэг, зураг төсөлд үнэлгээ хийх дасгал ажил, симуляцийн програм хангамж, баригдсан 2 төрлийн амины орон сууцад хийх ашиглалтын үеийн үнэлгээний дадлага ажил гэсэн хэсгүүдээс бүрдсэн 9 өдрийн сургалтад хамрагдаж, 2 шатны шалгалтыг амжилттай давж Монгол улсын хэмжээнд анхны Ногоон барилгын аудиторууд боллоо. 

Гэрчилгээ гардуулах ёслолд Хот Байгуулалт, Барилга, Орон Сууцжуулалтын яам, Барилгын хөгжлийн төв, GMIT, ШУТИС, Монголын Барилгын Үндэсний Ассоциацийн төлөөллүүд болон МНБХ-ийн гишүүн байгууллагууд мөн оролцож, “Ногоон барилгын хялбаршуулсан төрлийн аудитор”-уудад баяр хүргэн, амжилт хүслээ. 

Ногоон барилгыг үнэлэх шалгуур үзүүлэлт тодорхой болж, шаардлагатай хүний нөөцийг бэлдсэнээр хүлэмжийн хийн ялгарлыг багасгаж, ус болон бусад нөөцийг хэмнэн,  барилга байгууламжийн ашиглалтын зардлыг бууруулах, ногоон хөрөнгө оруулалт татах, иргэдэд ногоон зээлийг  хүртээмжтэй болгох зэрэг давуу талуудтай юм.