Засгийн Газрын хуралдаанаар 2025 оны төсвийн тодотголыг хэлэлцэж, холбогдох хуулиудад өөрчлөлт оруулах төслүүдийг хамт өргөн мэдүүлэх нь зүйтэй гэж шийдвэрлэжээ. 2025 оны төсөвт тодотгол хийхтэй холбогдуулан 2026 оны төсвийн хүрээний мэдэгдэл, төсвийн төсөөллийн тухай хуулиудад өөрчлөлт оруулах төслүүдийг хамтад нь өргөн мэдүүлэх юм байна.

Засгийн Газраас хэрэгжүүлэхээр төлөвлөсөн 14 мега төсөл дээр тодорхой 14 шалгуураар эрэмбэлж, эхлээд 4 төслийг үргэлжлүүлнэ. Харин  5 төсөлд хөрөнгө оруулалт татаж, төр хувийн хэвшлийн түншлэлээр хэрэгжүүлж, нээлттэй сонгон шалгаруулалт зарлана.  Бусад таван төслийг хойшлуулах шаардлагатай гэж үзжээ.

Нийслэл Улаанбаатар хотод хэрэгжүүлэх 24 төслийн заримыг нь хойшлуулах нөхцөл байдал үүсэж байна. Учир нь, төсвөөс хөрөнгө зарцуулж төсөл хэрэгжүүлэх боломж хязгаарлагдаж байгаа учраас хувийн хэвшлийн хөрөнгө оруулалтаар хэрэгжүүлэх хэлбэр рүү чиглүүлэх, энэ хүрээнд гадаад дотоодын хөрөнгө оруулалтыг татаж ажиллахаар болжээ.