Дэлхийн 173 хотыг эрүүл мэндийн үйлчилгээ, боловсрол, тогтвортой байдал, дэд бүтэц болон хүрээлэн буй орчин зэрэг хэд хэдэн шалгуур үзүүлэлтээр үнэлэн эрэмбэлэхэд Австрийн нийслэл Вена хот амьдрахад хамгийн таатай хот байхаа больсныг албан ёсны тайлан харуулжээ. Тус хот нь “Economist Intelligence Unit” /EIU/ байгууллагаас жил бүр гаргадаг жагсаалтыг гурван жил тэргүүлсний эцэст Данийн нийслэл Копенхагенд байр сууриа алдсан байна.

Тодруулбал, мягмар гарагт танилцуулсан амьдрахад хамгийн таатай дэлхийн хотуудын энэ оны жагсаалтын нэгдүгээрт Данийн нийслэл Копенхаген бичигдсэн байна.

Копенхаген хот тогтвортой байдал, боловсрол, дэд бүтцийн хувьд “төгс” оноо авснаар уг жагсаалтыг тэргүүлсэн бол Вена хот Швейцарын Цюрихтэй хамт хоёрдугаар байрт шалгарчээ. Харин Австралийн Мельбурн дөрөвдүгээр байраа хадгалсан бол Швейцарын Женев хот жагсаалтын тавдугаарт бичигдлээ.

Түүнчлэн Австралийн Сидней хот долоодугаар байраас зургаадугаар байр луу ахисан бол Японы Осака, Шинэ Зеландын Окленд долоодугаар байрт бичигджээ. Есдүгээр байрт Аделаида орсноор эхний 10-т багтсан Австралийн гурав дахь хот болсон бол Канадын Ванкувер 10 дугаарт жагссан байна.