MAD архитекторуудын ур ухаанаар бүтсэн ФЕНИКС музей нь хүмүүсийн нүүдэл, цагаачлал, дүрвэлт, гэр орноо орхих зэрэг үйл явдлыг уран зураг, гэрэл зураг, баримал, архитектур зэрэг урлагийн хэлээр өгүүлсэн, дэлхийд анх удаа бүтээгдсэн өвөрмөц соёлын төв юм.

Энэхүү музей нь хүний шилжилт хөдөлгөөний түүхийг зөвхөн газарзүйн шилжилт бус, түүнийг дагалдах сэтгэл зүй, дурсамж, хувь хүний амьдралын аялал зэргийг гүнзгий түвшинд харуулдгаараа онцлог. Үзэгчдэд зориулсан уран бүтээлүүдийн дунд "Цагаач гэр бүл" нэртэй гэрэл зургийн үзэсгэлэн, 2000 чемоданаар бүтээгдсэн лабиринт онцгой сэтгэгдэл төрүүлдэг. Тус лабиринт нь хүний амьдралын төөрөгдөл, дотоод аялал, сонголт болон өөрийгөө эрж хайх үйл явцыг бэлгэдсэн бүтээл юм.

Музейн архитектурын төвд байрлах “Tornado” нэртэй байгууламж нь 30 метр өндөр, 550 метр урт хоёр давхар шатаар бүтээгдсэн бөгөөд мод болон зэвэрдэггүй ган материалаар хийгджээ. Энэхүү бүтээл нь хүний нүүдэл, хөдөлгөөн, хоорондын харилцаа, хувь хүний дэвшлийг бэлгэддэг. Зочид шатаар өгсөн гарч Роттердамын усан боомтыг дээд цэгээс тольдон харах боломжтой.

ФЕНИКС музей 2025 оны 5-р сарын 16-нд албан ёсоор нээлтээ хийсэн бөгөөд олон улсын хэвлэлүүд уг төслийг “Дэлхийн анхны шилжилт хөдөлгөөнд зориулсан орчин үеийн урлагийн музей” хэмээн онцолжээ.