"Барилгын салбар дахь AI" сургалт зохион байгууллаа
Монголын Барилгын Үндэсний Ассоциаци ТББ-ын "Бүх гишүүдийн чуулган VI" угтан "Барилгын салбар дахь AI" сургалтыг гишүүн байгууллага болон барилгын салбарынханд зориулан өнөөдөр/2025.06.17/ зохион байгууллаа.
Сүүлийн жилүүдэд барилгын салбарт хиймэл оюун ухааныг зардал бууруулах, хугацаа хэмнэх, чанар сайжруулах зэрэг зорилгоор эрчимтэй ашиглаж байна. Барилгын салбарынхан дунд зураг төслийн салбарынхан AI-г өргөн хүрээнд хэрэглэх болсон бөгөөд BIM (Building Information Modeling) буюу барилгын мэдээллийн загварчлалд хиймэл оюун ухаан ашиглан барилгын зураг төслийн алдааг эрт илрүүлж, олон хувилбарт шийдэл санал болгох болсон нь тухайн барилга алдаатай баригдахаас урьдчилан сэргийлж төсөв, зардал хэмнэж байна.
Түүнээс гадна барилга барих газрын мэдээллийг хиймэл дагуул, дрон, IoT төхөөрөмжөөс авч хамгийн тохиромжтой байршил тодорхойлох, архитектур дизайн, барилгын үйл явцын удирдлага буюу төслийн хуваарийг автоматаар шинэчилж, хөдөлмөр, тоног төхөөрөмж, материалын оновчтой хэрэглээг тооцоолдог болоод байна.
Барилгын салбарт хиймэл оюун ухаан (AI) нэвтрүүлэхэд манай улсын хууль эрх зүйн орчныг шинэчлэх шаардлагатай ба одоогийн барилгын норм, дүрэм, тусгай зөвшөөрөл, хяналт, мэдээллийн хамгаалалт зэрэг олон эрх зүйн заалтууд AI болон дижитал технологийн хэрэглээг нарийвчлан зохицуулж чадахгүй байгааг онцолсон юм.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.