Австрали Улсад орон сууцны дундаж үнэ түүхэндээ анх удаа нэг сая австрали долларыг давлаа. Энэ нь ойролцоогоор 652,000 америк доллартой тэнцэж байгаа бөгөөд тус улсын Үндэсний статистикийн газар энэ талаар албан ёсоор мэдээлжээ.

2025 оны гуравдугаар улирлын байдлаар орон сууцны дундаж үнэ 1,002,500 австрали долларт хүрсэн нь өмнөх улирлаас 0.7 хувиар өссөн үзүүлэлт аж. Үнийн өсөлт Баруун болон Өмнөд Австрали, тэр дундаа Күинслэнд мужид илүү эрчимтэй байгааг онцолжээ.

Австралид үл хөдлөх хөрөнгө хамгийн үнэтэй хөрөнгө оруулалтын нэг байсаар ирсэн. Гэсэн хэдий ч сүүлийн жилүүдэд орон сууцны үнэ тогтмол өсөн нэмэгдэж, энгийн иргэдийн хувьд орон сууц худалдан авах, түрээслэх боломж улам бүр хумигдаж байна.

Шинжээчдийн үзэж буйгаар,

• Орон сууцны хомсдол

• Хүн амын хурдацтай өсөлт

• Үл хөдлөх хөрөнгийн хөрөнгө оруулагчдад олгодог татварын хөнгөлөлт үнийн өсөлтөд голлон нөлөөлж байна гэжээ.

Австралийн Ерөнхий сайд Энтони Албанезе орон сууцны асуудалд онцгой анхаарал хандуулж байгаагаа мэдэгдсэн. Тэрбээр барилгын хууль, зөвшөөрөл олгох үйл явцыг хялбаршуулах чиглэлээр бодлогын өөрчлөлт хийхээр зорьж байгаа аж.  

Мөн Австралийн Засгийн газар ирэх таван жилийн хугацаанд 1.2 сая шинэ орон сууц барихаар зорьж байгаа бөгөөд энэ нь нэг талаараа иргэдийн орлогод нийцсэн боломжийн үнэтэй орон сууцны хүртээмжийг нэмэгдүүлэх, нөгөө талаараа орон сууцны үнийн өсөлтийг хязгаарлах алхам болох төлөвтэй байгаа аж.