БНСУ-д 2022 оны гуравдугаар сараас хойш сүүлийн гурван жилийн хугацаанд Сөүл хотод 63 нүх гарчээ. Үүний 30 хувь нь өмнөд Ганнам дүүрэгт байна. Эдгээр томоохон нүх гэнэт үүсээд байгаа нь санаа зовоосон асуудал болоод байна. Хамгийн сүүлд Пусан хотын Сасан дүүрэгт байрлах метроны өргөтгөлийн барилгын ойролцоо нүх гарсан бөгөөд сүүлийн гурван жилийн хугацаанд 14 нүх гарсан байна.

Пусан хотод гарсан нүх ойролцоогоор 3 метр өргөн, 2 метр гүн байжээ. Өнгөрсөн сард Кёнги мужийн Гванмён хотын метроны барилгын талбай нурсны дараа Сөүлд хэд хэдэн нүх гарсан.

Аюулгүй байдал, онцгой байдлын албаны мэдээлснээр, нүх үүсэх гол шалтгаан нь газар доорх бүтээн байгуулалт, ус хангамж, ариутгах татуургын хуучин хоолой хагарах, гүний ус алдагдсан, газар доорхи бүтээн байгуулалтаас үүдэлтэй байна гэдгийг онцолжээ.

Өнгөрсөн сард гэхэд уулзвар дээр 20 метр өргөн, 20 метр гүн нүх нээгдэж, түүнээс ердөө гуравхан километрийн зайтай Гангдун дүүргийн уулзвар дээр дахин нүх гарч, мотоцикльтой хүн амиа алдсан юм.  

Үүний зэрэгцээ, Сөүл хотын Мапо дүүрэгт өнгөрсөн сарын дундуур 40 сантиметр өргөн, 1.3 метр гүнтэй өөр нэг нүх үүсчээ. Солонгост ихэвчлэн хотжилт ихтэй газруудад нүх гарах тохиолдол  гарч байгааг Сөүл хотын захиргаанаас мэдээллээ.