Европын хамгийн том 3D хэвлэлттэй барилга Германы Хайдельберг хотод байрлах IT Server Hotel буюу "Wave House" юм. Сүүлийн жилүүдэд 3D хэвлэлттэй архитектур эрчимтэй хөгжиж, үндсэн урсгал болж байгаа бөгөөд энэхүү барилгыг PERI 3D Construction компани COBOD-ийн BOD2 3D хэвлэгч ашиглан барьсан байна. 

Энэхүү Wave House төсөл нь 3D хэвлэх технологийн давуу талыг ашиглан уйтгартай харагддаг дата төвүүдийн хэв шинжийг өөрчлөх оролдлогоос үүдэлтэй, шинэ өнгө төрхтэй төсөл юм. 

Ийм долгиолсон ханануудыг уламжлалт барилгын аргаар бүтээх боломжгүй бөгөөд дахин боловсруулж болох цементэн төрлийн хольцыг цоргоороо үе үеэр шахан гаргаж, гадна ханыг бүтээжээ. Барилгын нийт талбай нь 600 м² талбайтай, 54 метр урт, 11 метр өргөн, 9 метр өндөр ажээ. Барилгын ханануудыг 140 цагийн дотор хэвлэж дуусгасан нь 3D барилгын технологийн хурд, үр ашгийг харуулж байна .

Хэвлэгч төхөөрөмжийн ажил дууссны дараа ажилчид дээвэр, хаалга, гэрэлтүүлэг, цахилгаан тоноглол зэрэг орчин үеийн интернет холболт бүхий дата төвийн шаардлагатай бүрэлдэхүүнүүдийг угсарч дуусгасан байна. Харин дотоод заслын будгийг Deutsche Amphibolin-Werke компанийн робот будгийн машин хийсэн байна. 

Гүйцэтгэгч компанийн хэвлэлийн мэдээнд тайлбарласнаар: “Дата төвүүдийн аюулгүй байдлын болон бусад шалтгааны улмаас цонх болон том нээлттэй үүд байх нь тун ховор бөгөөд эдгээр барилгууд ихэвчлэн уйтгартай, сэтгэл татам биш харагддаг. Хэрэв уг төвүүдийг хотын гаднах бүсэд байрлуулж байвал энэ асуудал тийм ч сонин биш болох юм. Гэвч дата төвүүдийг хэрэглэгчдэд ойр байрлуулах хандлага нэмэгдэж, хотын зах болон хот дотор байрлуулах хэрэгцээ үүссэнээр тэдгээрийг илүү сэтгэлд нийцсэн, үзэмжтэй болгох шаардлага гарч ирсэн.” гэжээ.