Монгол Улсын эдийн засгийн нөхцөл байдал барилга, бүтээн байгуулалтын салбарт хэрхэн нөлөөлж буй, барилгын салбарын зах зээлийн нөхцөл байдал, санхүүжилт, гаднын хөрөнгө оруулалт болон судалгааны нэгдсэн мэдээлэл хүргэх зорилгоор "Construction market 2025" форумыг Монголын Барилгын Үндэсний Ассоциаци ТББ Хот Байгуулалт, Барилга, Орон Сууцжуулалтын Яамтай хамтран дөрөвдүгээр сарын 30-ны өдөр зохион байгууллаа. Уг арга хэмжээнд төр болоод хувийн хэвшлийн төлөөллүүд, барилга бүтээн байгуулалтын хөрөнгө оруулагчид, барилга угсралт, зураг төсөл, архитектур дизайн, материал үйлдвэрлэгч, ханган нийлүүлэгч зэрэг барилгын салбарын 250 орчим оролцогчид оролцсон юм.

    Дэлхийн геополитикийн нөхцөл байдал, БНХАУ-ын барилгын материалын үнийн өөрчлөлт, ОХУ-ын эдийн засгийн байдал нь дэлхийн зах зээлд тодорхойгүй байдал үүсгэж, хөрөнгө оруулагчдын эрсдэлээс зайлсхийх хандлагыг нэмэгдүүлж байна. Энэ байдал нь Монгол Улсад ч хөрөнгө оруулалт хийх сонирхол буурах нь барилгын салбарт хөрөнгө оруулалтын санхүүжилт багасах, шинэ төслүүдийн эхлэл удаашрахад хүргэх эрсдэл үүсгэж болзошгүй байна. Иймд уг форумын хүрээнд холбогдох төрийн болон хувийн хэвшлийн байгууллагуудыг дэлхийн эдийн засгийн хамгийн сүүлийн үеийн мэдээллийг сонсож уг арга хэмжээнээс гарах зөвлөмжийг ирээдүйн үйл ажиллагаандаа тусгах, улс орнуудыг төсөв хөрөнгө, хөрөнгө оруулалтын орчин, мега төслүүдээ эрэмбэлж ирээдүйд үүсэж болзошгүй эрсдэлээс аль болох хохирол багатай, ухаалаг, зөв төлөвлөлтийг хийхийг зөвлөсөн арга хэмжээ болж өнгөрлөө.