“Барилга МН” ХХК нь 2007 оноос эхлэн Монгол Улсад зар сурталчилгаа, худалдааны зуучлал, вэб сайт хийх, үзэсгэлэн яармаг зохион байгуулах зэрэг үйл ажиллагааг “Барилга.МН”, “BARILGA EXPO” нэрийн дор албан ёсоор эрхэлж, эдгээр нэршлээр олон нийт, бизнесийн орчинд итгэл хүлээсэн брэнд болон 18 жилийн турш үйл ажиллагаа явуулж байгаа бөгөөд дээрх нэршлүүдийг барааны тэмдэг эзэмших эрхийн мэдүүлгээр хууль ёсоор хамгаалуулсан болно. 

Гэтэл “Darkhanbarilga.mn” болон “Darkhan Barilga Expo” нэршлийг ашиглан үйл ажиллагаа явуулж буй “Сондор Дижитал” ХХК нь дээр дурдсан барааны тэмдгүүдийг бидний зөвшөөрөлгүйгээр ашиглаж,  оюуны өмчийн эрхийг зөрчиж, манай харилцагч байгууллагууд, хэрэглэгчдийн дунд төөрөгдөл  үүсгэж байна.

“Барилга МН” ХХК нь жил бүр хоёр удаа “BARILGA EXPO” үзэсгэлэн яармаг зохион байгуулдаг бөгөөд ижил төстэй нэршил ашигласнаас үүдэн харилцагчид андуурч, төлбөр, үйлчилгээтэй холбоотой маргаан, гомдол ирүүлсээр байна.

Бид энэхүү нэр хүнд бүхий брэндийг бий болгоход олон жилийн хөдөлмөр, хөрөнгө оруулалт, нэр хүнд, бизнесийн итгэлцэл шингэсэн бөгөөд түүнийг ижил төстэй байдлаар бусад этгээд ашиглах нь бизнесийн ёс зүйгүй төдийгүй хууль зөрчсөн үйлдэл юм.

Иймд “Darkhanbarilga.mn” болон “Darkhan Barilga Expo” нь манай компанитай аливаа хэлбэрээр холбоогүй бөгөөд уг нэршил, үйл ажиллагаа нь бидний барааны тэмдгийн эрхийг зөрчиж байгаа тул бид Монгол Улсын Оюуны өмчийн газар болон холбогдох байгууллагад хандан, хэрэг прокурорын шатанд шилжээд байгаа бөгөөд энэхүү зөрчлийг таслан зогсоох хууль ёсны арга хэмжээг авч байгааг үүгээр албан ёсоор мэдэгдэж байна.

Барилга МН