Улаанбаатар хотыг хөгжүүлэх 24 мега төслийн хүрээнд хэрэгжиж буй авто замын хамгийн том бүтээн байгуулалтын нэг болох “Туулын хурдны зам” төслийн хүрээнд нийслэлийн зүүн болон баруун бүсийг холбох 32 км урт, 6 эгнээ авто зам баригдана. Энэхүү зам нь Баянзүрхийн товчоо, Улаанбаатар–Налайх чиглэлийн авто замаас эхлэн баруун аймаг руу гарах Аюулгүйн тойрог хүртэл үргэлжлэх бөгөөд хотын төвийн бүсээр дайран өнгөрөх хэсэгт гүүрэн байгууламжууд багтах юм.

Анх 4 эгнээ зам болгон төлөвлөж, нийт төсөвт өртгийг 916 тэрбум төгрөгөөр баталсан боловч 2025 оны нэгдүгээр сарын 2-нд болсон Засгийн Газрын хуралдаанаар төслийг 6 эгнээ болгох, гүүрэн байгууламжуудын хэмжээг тэлэх шийдвэр гарч, нийт төсөв 1.9 их наяд төгрөгт хүрсэн. Мөн гүүрэн байгууламжийн урт 6771 метрээс 9878 метр болж нэмэгдсэн бөгөөд ажилчдын цалин, техник ашиглалтын үнийг шинэчилснээр төсөв дахин өсч, нийт өртөг 2.384 их наяд төгрөг болсон байна.

Нийслэлийн төсвөөс зөвхөн 2025 онд 538.6 тэрбум төгрөгөөр санхүүжүүлэхээр баталгаажуулсан бөгөөд төсөл Улаанбаатар хотын авто замын ачааллыг бууруулж, хөдөлгөөний үр ашгийг дээшлүүлэх, эдийн засгийг дэмжих өндөр ач холбогдолтой бүтээн байгуулалт гэж тооцогдож байна.