АНУ-ын орон сууцны зээлийн зах зээл хүнд цохилтонд ороод байна. Хамгийн түгээмэл бүтээгдэхүүн болох 30 жилийн хугацаатай тогтмол хүүтэй ипотекийн зээлийн дундаж хүү 13 нэгжээр өсч 7.1 хувьд хүрчээ. Энэхүү үзүүлэлт нь өнгөрсөн хоёрдугаар сараас хойших хамгийн өндөр үзүүлэлт болж байна.

Энэ өсөлт нь Ерөнхийлөгч Дональд Трампын олон оронд шинээр ногдуулсан тарифын нөлөөгөөр АНУ-ын бондын зах зээл доргисонтой шууд холбоотой.

Түүнчлэн хэрэглэгчдийн инфляцийн хүлээлт гуравдугаар сард 5 хувь байсан бол дөрөвдүгээр сард 6.7 хувь болж огцом өссөн нь бондын өгөөжийг улам шахсан байна. Инфляцийн хүлээлтийн түвшин 1981 оноос хойших хамгийн өндөр хүлээлт болж байна.

АНУ-ын орон сууцны хамгийн идэвхтэй улирал болох хаврын зах зээлд эдгээр нөхцөл байдал сөргөөр нөлөөлж байгаа юм. "Ийм муу орчинд орон сууцны тухай март" хэмээн Piper Sandler компанийн эдийн засагч Нэнси Лазар CNBC телевизэд өгсөн ярилцлагадаа дурьджээ. Тэрбээр мөн "ипотекийн хүү өсөж иргэд ажлын байрандаа  эргэлзэж байгаа нь орон сууцны эрэлт буурахад хүргэнэ" гэдгийг онцоллоо.