Нийслэлийн Засаг даргын тамгийн газар, Барилга хот байгуулалтын яам, Японы олон улсын хамтын ажиллагааны байгууллагууд  хамтраад  хот байгуулалтын  асуудлаар семинар  зохион байгууллаа.  Тус семинараар хот төлөвлөлт, эмх цэгцтэй зохион байгуулалт, гэр хорооллын асуудал гээд олон асуудлыг зөв зохистой шийдвэрлэх талаар албаны хүмүүс санаа бодлоо солилцлоо. Мөн Улаанбаатар хотыг хэвтээ болон  босоо тэнхлэгийн объект болгон метро явуулах, түүнийг барьж байгуулах үйл ажиллагаа явуулах боломжийг хангасан PPP бүдүүвчийг зурах,  Япон Улсын буцалтгүй тусламж болон хувийн хэвшлийн санхүүжилт, технологийг татан оролцуулах талаарх санал санаачлагууд  яригдлаа.

    Улаанбаатар хотын захирагч бөгөөд Нийслэлийн засаг дарга Э.Бат-Үүл хэлэхдээ бид хөгжингүй орнуудаас суралцах хэрэгтэй. Тэрнээс биш өөрсдөө цоо шинэ юм гаргаж ирэх гээд бодоод, бясалгаад байх хэрэггүй. Газар хөдлөлтөд тэсвэртэй чанартай орон суцыг Япончууд л барьдаг. Бид өөрийнхөө хөрсөнд тааруулаад суралцаж ажиллах хэрэгтэй гэж хэллээ.
Энэ үеэр  Э. Бат-Үүл даргатай уулзаж ярилцлаа.

-Таны ажлын үр дүн иргэдэд харагдаж эхэллээ.  Өнөөдрийн арга хэмжээний талаар  дэлгэрэнгүй мэдээлэл өгөөч?
-Өнөөдөр энд Япон Монголын хамтарсан хот байгуулалтын семинар  болж байна. Тус семинарт Японоос мэргэжилтнүүд ирэн оролцож, эмх цэгцтэй иргэдэд аюулгүй хот төлөвлөлтийн талаар туршилга хуваалцаж байна. Дэлхийн  2-р дайны дараа  Япон орон  манай өнөөгийн Улаанбаатар шиг эмх замбараагүй, хот байгуулалтын асуудал нь хүндхэн байсан. Гэвч тэд шийдлийг олж амжилтанд хүрч чадсан. Бид тэднээс суралцаж хурдан шуурхай ажиллах хэрэгтэй гэж үзэж байна. 
- Замын хөдөлгөөн тодорхой хэмжээгээр буурсан нь үнэхээр саашаалтай. Таны анхаарлыг татаж байгаа дараагийн асуудал  юу вэ?

-Барилгын салбарт өрнөж байгаа томоохон асуудлууд ойрын үед анхаарал их татаж байгаа. Нийслэлийн хэмжээнд 80 гаруй барилга ямар ч зөвшөөрөлгүй баригдсан байна. Эдгээрийг зүгээр хараад сууж байсан мэргэжлийн хяналтын даргыг ажлаас нь чөлөөлөх хүсэлт гарсан. Гэвч ажлаа өгөхгүй, буруугаа хүлээхгүй цаг хожоод  ажил удаашруулаад байна. 
80 гаруй барилгын компаний эзэд, зээл өгсөн банкууд гээд дээгүүр доогуур холбоо сүлбээ их байгаа нь ойлгомжтой. Гэвч бид  хууль дүрэмтэй амьдрах хэрэгтэй. Энэ тал дээр арга хэмжээ авна.

- Зөвшөөрөлгүй баригдсан барилгуудыг  шууд л нураах уу?
- Хууль нь тийм юм чинь. Нураажил таарна. Энэ замбараагүй асуудлыг шийдэх л хэрэгтэй. Шийдэхгүй бол би энд засаг дарга гээд байж байх нь утгагүй. Хичнээн их мөнгөөр барьсан бай, хэдэн төгрөгний зээл банкнаас авсан бай тэр бүгд бидэнд хамаагүй.  Харин яах гэж  дур мэдэн барилга барьсан, яах гэж эрсдэлтэй алхам хийсэн гэдгийг нь бид асуух хэрэгтэй.  Тэд мэдээж эрсдлийг тооцсон байх. Тиймээс хариуцлагаа хүлээх үүрэгтэй. Энэ нь эргээд дур зоргоороо авирлагч хүмүүст сургамж болох хэрэгтэй. Харин ч буулгах зардлаа хүртэл тус компани гаргах үүрэгтэй. Албадан буулгасан тохиолдолд улс эргүүлээд буулгасан зардлаа нөхөн авах эрхтэй. Одоо бид жаахан дүрэм журамтай байж  хот, нийслэлийн стандартруугаа орсон нь дээр.

- Таныг нийслэлийн хаягжилтын тал дээр  цогц арга хэмжээ авах гэж байгаа гэж сонссон?
-Манайхаас өөр хаана ч ийм замбараагүй  нийслэл байхгүй.  Наад зах нь жолооч нар нь машин барьж явахдаа эрээн мяраан зарлалын самбар уншиж яваад аваар осол гаргадаг. Энэ аюулгүй байдалд нийцэхгүй. Хотод хэн дуртай нь яаж ч авирлах боломжтой болж. Гэвч одоо өөрчлөх цаг нэгэнт ирсэн.
                                                                                                                                                               

                                                                                                                                                                        Л.Мөнхчимэг