2024 оны байдлаар зөвхөн нийслэлд хоёроос дээш орон сууц эзэмшдэг 11350 иргэн байгаа бөгөөд эдгээрийн 21153 орон сууцанд 16.8 тэрбум төгрөгийн үл хөдлөх хөрөнгийн татвар ногдуулжээ.

Нийслэлд гурав ба түүнээс дээш орон сууц өмчилдөг иргэд, өөрийн хоёр орон сууцаа сонгон татвараас чөлөөлүүлээд, гурав дахь орон сууцанд албан татвар төлөх хуулийн хэрэгжилтийг 2022 оны нэгдүгээр сарын 1-нээс мөрдөж эхэлсэн.

Өнөөдрийн байдлаар нийслэл дэх үл хөдлөх хөрөнгөөс 0.6-1 хувийн татвар авч байгаа бол орон нутагт эзэмшиж буй орон сууцанд татвар ногдуулахгүй юм байна. Мөн иргэний хүсэлтээр татвар төлөх нь боломжгүйг тогтоовол 1-2 жилээр төлөх хугацаагаа сунгах боломжтой байдаг.

Татварын ерөнхий газраас 2024 онд үл хөдлөх эд хөрөнгийн албан татвараас төвлөрсөн орлого 245.6 тэрбум төгрөг болж, татварын орлогын хэмжээ 2023 оныхтой харьцуулахад 8.5 хувиар буурчээ. Татварын байгууллагаас тооцоолсон дүнгээр 2024 онд 338.6 тэрбум төгрөгийн орлого төвлөрүүлэх байсан ч гүйцэтгэл нь 72.5 хувьтай гарсан байна.