Банкнуудын ногоон зээлийн үлдэгдэл 2024 оны IV улирлын байдлаар 1.3 их наяд төгрөг байгааг Монголбанк мэдээллээ. Өөрөөр хэлбэл банкнуудын ногоон зээлийн үлдэгдэл нийт зээлийн 3.7 хувийг эзэлж байна.

Өнгөрсөн онд банкнууд эрчим хүчний хэмнэлтийн чиглэлд хамгийн өндөр буюу 896.4 тэрбум төгрөгийн зээл олгосон бөгөөд үүний дотор эрчим хүчний хэмнэлттэй барилгын салбарт түлхүү олгосон байна. Мөн тогтвортой хөдөө аж ахуй, газар ашиглалт, ой, эко аялал жуулчлалын салбар болон агаар, хөрсний бохирдлоос сэргийлэх чиглэлд 162 гаруй тэрбум төгрөгийн зээл олгосон нь бусад салбараас өндөр дүнтэй байгаа аж. Бохирдлоос сэргийлэх болон тогтвортой ус хаягдлын чиглэлд олгосон зээлүүд чанаргүй зээлийн ангилалд хамгийн өндөр буюу 6.4-6.8 хувийг эзэлж байгааг тайланд тодотгожээ.

Банкнууд 2030 он гэхэд ногоон зээлийн багцаа нийт зээлийнхээ 10 хувьд хүргэх зорилт тавиад байна. Банкнууд дотоод болон гадаад зах зээлээс ногоон зээлийн эх үүсвэр татан төвлөрүүлж буй ч энэ чиглэлийн төсөл хөтөлбөрүүд дутмаг байгааг Санхүүгийн Зохицуулах Хороо тодотгож байсан юм.