Монголбанкнаас өнгөрсөн оны нийгэм эдийн засгийн тойм мэдээлэл, мөн статистик мэдээллийн хураангуйг танилцууллаа. Тодруулбал, өнгөрсөн онд манай улсын үйлчилгээний тэнцэл алдагдалтай гарч, аялал жуулчлалын үйлчилгээний алдагдал 1 тэрбум ам.доллар байна. Энэ нь монголчуудын гадаад улсад аялсан нийт дүн юм. Мөн нүүрсээ БНХАУ-ын тээврийн компаниудаар тээвэрлүүлэхэд 700 сая ам.доллар төлжээ.  

2024 онд улсын инфляц 9.1 хувьд хүрч Монголбанкны зорьсон түвшнээс 1.1 хувь илүү байгаа юм. Иймд мөнгөний хатуу бодлогоо үргэлжлүүлнэ гэдгээ Төвбанкны Ерөнхийлөгч Б.Лхагвасүрэн хэллээ. Мөн түүнчлэн цахилгаан болон махны үнэ нэмэгдсэн нь инфляц 9 хувьд хүрэхэд голлон нөлөөлсөн байна. 

Зээлийн өсөлтийн хувьд хэрэглээний болон бизнесийн зээл тус бүр 50 хувиар өссөн бөгөөд Монголбанк зээлийн хүүг бууруулах бодлогоо үргэлжлүүлэн хэрэгжүүлж байна. Ирэх тавдугаар сараас дулааны үнийг нэмэх тул  инфляц энэ онд өндөр хэвээр байх ч 2025 оны сүүлээр буурах төлөвтэй байна гэлээ.         

Өнгөрсөн онд системийн нөлөө бүхий банкууд болох Голомт, ХХБ, ХААН гадаад зах зээлээс бонд гаргасан. Валютын нөөц өндөр хэвээр байгаа тул энэ онд эдийн засгийн өсөлт 6-7 хувь байна. Гэхдээ хамгийн том сорилт нь инфляц гэдгийг онцолж байв.

Ипотекийн зээлийн тухайд эргэн төлөлтөөр дараагийн  зээлийг санхүүжүүлэх бодлого энэ онд үргэлжилнэ. Энэ эх үүсвэрээс 500 орчим тэрбум төгрөг цуглардаг. Мөн Үндэсний баялгийн сангийн хуулийн дагуу Хуримтлалын сангийн эх үүсвэрийг ипотект зарцуулдаг. Эдгээр эх үүсвэр нийлээд 1.2 их наяд төгрөг болдог.      

Тодорхой шаардлага хангасан, амины орон сууцанд ипотекийн зээл олгох ба амины орон сууц бүрд олгохгүй. Хотын А бүсэд байр авах бол 6 биш, илүү өндөр хүүтэй зээл олгох хувилбарыг судалж байна. Банкнууд өөрийн эх үүсвэрээр ипотекийн зээлийг жилийн 12 хувийн хүүтэй олгож байна.  

Ханшийн тухайд улирлын чанартай өсөлт байна. Өнгөрсөн сард Найман шаргад ам.долларыг бэлнээр авах эрэлт үүссэн. Үүний улмаас бэлэн, бэлэн бус ханшийн зөрүү ихээхэн өслөө. Гадаад валютын нөөц өндөр байгаа тул ханш өсөх эдийн засгийн суурь нөхцөл байхгүй. Гэхдээ бидний хэрэглээ өссөөр, импортын өсөлт буурахгүй байвал ханшид ирэх дарамт нэмэгдэнэ гэв.