Улаанбаатар хотод шинээр баригдаж байгаа барилгуудад удаа дараалан гарсан ослоос үүдэн МХЕГ-ын даргын баталсан 2012 оны 09сарын 11-ний өдрийн 01/124 тоот удирдамжийн дагуу Улаанбаатар хотын хэмжээнд баригдаж байгаа барилга байгууламжийн чанар, өргөх байгууламжийн техник ашиглалт, хөдөлмөр аюулгүй байдал, эрүүл ахуй, нийгэм хамгааллын байдалд 2012 оны 9-р сарын 12-21ний өдрүүдэд 6 ажлын хэсгийн хийсэн шалгалтын дүнг өнөөдөр танилцууллаа.

      Барилга байгууламжид хийсэн шалгалтын дүнг танилцуулах хуралд БХБЯ-ны дэд сайд н.Байгальмаа, Хүний эрхийн үндэсний коммисийн ахлах референт н.Өнөржаргал, Улаанбаатар дулааны шугам сүлжээ, ус суваг, Улаанбаатар цахилгаан шугам сүлжээний төлөөлөл болон албаны бусад хүмүүс хүрэлцэн ирсэн байлаа.   

       Хяналт шалгалтанд Сүхбаатар, Баянгол, Баянзүрх, Хан-Уул, Чингэлтэй, Сонгинохайрхан, Багануур, Налайх дүүргийн 594 барилга байгууламж, 782 ачаа өргөх байгууламж, 1892 аж ахуйн нэгж байгууллага, 1692 инженер техникийн ажилтан хамрагдсан байна.  

Мөн гадаадын хөрөнгө оруулалттай барилга угсралтын ажил явуулж байгаа 29 байгууллагын 41 барилга шалгалтанд хамрагдсан байна.

      Шалгалтаар барилга байгууламжийн чанар, барилгын үндсэн хийц бүтээц, техникийн нөхцөлийн иж бүрдэлт, барилгын зураг төсөлд магадлал хийсэн байдал, барилгын ажил үргэлжлүүлэх зөвшөөрөл авсан эсэх, угсралтын төлөв байдал, илд далд ажлын акт, талбайн журналын хөтлөлт, нийтлэг илэрсэн зөрчил дутагдлууд, дүгнэлт цаашид авах арга хэмжээний заавар, зөвлөмж гэсэн 30 гаруй үзүүлэлтээр шалгалт хийж, хяналтын хуудсаар эрсдэлийн үнэлэлт өгсөн байна.

   Хяналт, шалгалтанд нийт 594 барилга байгууламж хамрагдсанаас 168 барилга байгууламж буюу 27,8% нь барилга угсралтын ажил эхлэх, үргэлжлүүлэн барих зөвшөөрөлгүй байсан нь шалгалтаар илэрсэн юм.

      Үүнд: “Би Эс Би глобал” компанийн ундааны үйлдвэр, “Эка могул” компанийн оффис болон агуулахын “А”, “Б” блокын барилга, “Симпедил Монголиа” компанийн барилгын материалын агуулах, дэлгүүр, “Асар шим” компанийн үйлчилгээний барилга, “Зуншин” компанийн “Хүслийн өргөө” цогцолбор, “Бүрд констракшн” компанийн 96 айлын орон сууц, “Испани харш” компанийн 96 айлын орон сууц, цэргийн музейн 300 айлын орон сууц, “Люкс нью проперти салюшн” компанийн 700 айлын орон сууцны хороолол, иргэн Энхбаярын 69 айлын орон сууц зэрэг 168 барилгын жагсаалт гарсан байна.                

      Дараагийн гарсан багц зөрчил нь шалгалтанд хамрагдсан 594 барилга байгууламжаас 179 буюу 30,1% нь тухайн барилга байгууламжид зураг төслийн магадлал хийлгээгүй зөрчил илэрсэн.    

      Харин барилга барих тусгай зөвшөөрөлгүй 29 аж ахуйн нэгжийн үйл ажиллагааг зогсоосон байна. Мөн “Арвин сан тех” компани 7 давхар барилга барих зөвшөөрөлтэй мөртлөө 10 давхар барилгын ажил гүйцэтгэж байсан бол “МАК”, “Гантатанг”, “Хишиг хангай”компаниуд барилгын ажил гүйцэтгэх тусгай зөвшөөрлийн хугацаа нь дууссан байхад сунгуулаагүй барилгын ажил гүйцэтгэж байсан зөрчлийг шалгалтын явцад илэрсэн байна.

      Шалгалтаар илэрсэн дараагийн зөрчил нь тусгай зөвшөөрлийн хүрээнд эрх хэтрүүлэн үйл ажиллагаа явуулж байгаа аж ахуйн нэгжийн зөрчлийг илрүүлжээ. Үүнд: “Тамир ногоон дэлхий”, “Чингис эко тур” компаниуд 18 давхар барилга барих тусгайлсан зөвшөөрөл авалгүй барилгын ажил гүйцэтгэж байсан зөрчил илэрчээ.  

     Шалгалтаар илэрсэн дараагийн зөрчил нь 594 барилгын 112 буюу 18,8% нь техникийн нөхцөл буюу ус, дулаан, цэвэр бохир усны хангагч байгууллагуудаас холбогдох зөвшөөрлийг аваагүй байсан бол 174 барилга байгууламж буюу 29,3% нь барилга угсралтын талбай дээр тавигдах шаардлагыг биелүүлээгүй, холбогдох журнал, тэмдэглэлийг хөтлөөгүй, 254 барилга байгууламж буюу 42,7% нь зохиогчийн хяналтанд ороогүй гэсэн томоохон зөрчилтэй байжээ.

      Барилгын хийц, бүтээц болох цутгамал төмөр бетон рам, хучилтын бетон зуурмагаас дээж авч шахуулаагүй, бетоны бат бөхийг итгэмжлэгдсэн лабораториор шалгуулаагүй, бетонд тавигдах шаардлагын хэмжээнд хүрээгүй гэх мэт зөрчлүүд “Дехор” компанийн Ромео Жулета хотхоны 254 айлын орон сууцны хотхон гэх мэт 121 аж ахуйн нэгж дээр илэрсэн. Мөн барилгын зураг төсөл дээр заагдсан арматурыг өөр арматуртай хольж хэрэглэсэн зөрчил иргэн Соёмбын захиалагаар Сонгихайрхан “Их ачуут” компанийн гүйцэтгэж байгаа 10 давхар 70 айлын орон сууц, “Алтан билла” компанийн барьж байгаа барилгын С, D блок дээр ийм зөрчлүүд гарсан.    

      Хяналт шалгалтаар илэрсэн эдгээр зөрчлүүд барилгын салбарт хатуухан хяналт хэрэгтэйг харуулж байгаа юм. МХЕГ-аас бетон зуурмагийн 50 гаруй үелзлүүдэд зөвшөөрөлгүй баригдаж байгаа барилгуудад бетон зуурмаг нийлүүлэхгүй байх албан шаардлага хүргүүлжээ.