Нийслэлийн агаарын бохирдлыг 30 хувьд хүртэл бууруулна гээд байгаа  “Цэвэр агаар” төслөөс үнийг нь хөнгөлж өрхүүдэд тараасан утаагүй зуухны талаар сүүлийн үед санал гомдол нэлээд гарах боллоо. Халахгүй байна, тэсэрч дэлбэрч байна гэхчлэн олон айл өрх санал гомдол хэлж байгаа. Тиймээс уг утаагүй зуухыг хэрэглэж байгаа  Сонгинохайрхан дүүргийн VIII хорооны оршин суугч А.Өнөболдоос энэ талаар асууж тодрууллаа.

-Танайх яг ямар зуух тавьсан бэ?

-Манайх байшинтай учраас арай том талбай халаах зориулалттай “Өлзий” зуух авч тавьсан. Зуухаа тавиад хоёр сар гаруй хугацаа өнгөрч байна.

-Тэгээд хэр халж байх юм бэ. Танай байшинг хангалттай сайн халааж чадаж байна уу?

-Урьд нь манайх ханан пийшингээр өрөөнүүдээ халаадаг байсан. Харин нэг өдөр хорооноос төслийн зуух тарааж байгаа, заавал очиж ав гээд хүн хүрээд ирсэн. Хүнээс дам сонсох нь ээ утаа бага гардаг, бага түлшээр сайн халаадаг зуух гэхээр нь мөнгөө тушаагаад очоод л авчихсан. Харин зөрүүлээд манай хуучин пийшинг аваад явсан даа.

-Тэгээд таны бодсон шиг үр дүнтэй сайн зуух мөн байна уу?

-Эхэндээ их цэвэрхэн аятайхан санагдсан л даа. Анх тавьж байх үед цаг ч арай дулаахан байсан болохоор хэрэглээд байж болох юм шиг санагдсан. Битүүхэндээ их баяртай л байсан. Ойр ойрхон галлахгүй. Өдөрт ганцхан л удаа түлдэг болохоор эхнэр бид хоёрт их амар байсан. Манай эхнэр жирэмсэн, төрөх дөхөж байгаа болохоор хүйтрэхээр хэр сайн халах болоо гэсэн бодол бас жаахан зовоож байсан.

-Удахгүй ес эхэлж нэлээд хүйтрэнэ. Уг зуух тэгээд сайн халааж чадах болов уу?

-Манай байшин гурван өрөө л дөө. Хуучин байсан ханан пийшингээрээ халаагаад болдог л байсан. Харин энэ төслийн зуухыг ханан пийшинд холбож болохгүй учраас бусад өрөөнүүд маань сайн халахгүй л байна. Ганц өрөөг бол халаагаад л байх юм шиг байгаа юм. Мод нүүрсээ хийснээс хойш гурваас дөрвөн цагийн дараа асдаг, шаталт нь их удаан, заавал бүрэн гүйцэд унтарсны дараа л гал дахин түлэх ёстой юм билээ. Энэ хооронд гэр хөрөх эрсдэл бас байгаа юм.

-Зарим айлуудад тавьсан зуух дэлбэрч байна гэсэн мэдээлэл гараад байгаа. Танай пийшин дэлбэрчихгүй биз дээ?

-Яг стандартын дагуу зөв галлаад явбал зүгээр гэж мэргэжлийн хүмүүс нь хэлсэн болохоор гайгүй байх л гэж бодож байна даа. Хамгын гол нь зөв галлах хэрэгтэй юм билээ.

-Та сая нүүрс түлж байгаа гэлээ. Уг нь бол зориулалтын био түлш түлэх ёстой биз дээ?

-Тэр ч тийм л дээ. Гэхдээ яг үнэндээ тэр био түлшийг нь түлж байгаа айл бараг байхгүй шүү дээ. Манай энд лав ховор. Тэгээд тэр түлш чинь илч муутай, өртөг ч өндөр болохоор авч хэрэглэхгүй байгаа.

-Нүүрс түлэхээр утаа хэр их гарч байна?

-Хамаагүй бага гардаг юм билээ. Тэгээд ч өдөрт ганцхан л галлаж байгаа юм чинь. Эхнэр бид хоёр залуу хүмүүс. Удахгүй үрийн зулай ч үнэрлэх гэж байна. Утаагүй хотод амьдарч, үр хүүхдээ ч хорт утаагаар амьсгалуулахгүй байхыг хүсэлгүй яахав. Гэхдээ хүйтэн гэрт даараад суугаад байхыг хэн ч хүсэхгүй шүү дээ. Хэд хэдэн өрөөг халаачих чадалтай утаагүй зуухыг хийж болдоггүй юм байхдаа л гэж бодож байна даа. Өнөөдөр гэр хороололд амьдар­даг над шиг асуудалтай олон хүмүүс байгаа. Даарч хөрөөд өвчин зовлон тусах уу, ердийн пийшэнгээ хэрэглээд хотоо утаагаар дүүргэсээр байх уу гэсэн сонголт олон хүний өмнө ирээд байна шүү дээ.