Хэнтий аймагт 2012 онд улсын төсвийн 47 тэрбум төгрөгийн хөрөнгө оруулалтын төсөл хэрэгжих бөгөөд үүний 38 тэрбум төгрөгөөр Өндөрхаанаас Чойбалсан руу 193 км хатуу хучилттай авто зам барьж, Баян-Овоо, Баянмөнх сумын нутагт Хэрлэн гол дээр төмөр бетон хоёр гүүрийн ажил эхлэх юм. Мэргэжлийн сургалт үйлдвэрлэлийн төвийн барилгын ажлыг энэ онд дуусгаж, “Хан Хэнтий” чуулгын барилгыг 2,3 тэрбум төгрөгөөр барина. Баян-Адарга суманд байгуулсан “Монгол хатдын өргөө цогцолбор”-ын дэргэд “Дуурлиг нарс-Хүннү, Монгол ээж” музейн цогцолбор энэ жил баригдах ажээ. Ар халхын утай гэж алдаршсан Балданбэрээвэн хийдийн гол цогчин дуганыг өмнөх жилүүдэд сэргээн засварласан бөгөөд энэ онд тийш нь аялагч жуулчид сүсэгтнүүд өргөнөөр зорчин очих нөхцөлийг хангахын тулд хагас тэрбум гаруй төгрөгөөр эрчим хүчний шугам татаж, Бор-Өндөр хот руу шилэн кабель тавихаар болжээ. Мөн малчдыг холбоожуулж Баянмөнх, Галшар сумдад үндэсний оператор жи-мобайлын үйлчилгээ нэвтрүүлнэ. Баянхутаг суманд ноос боловсруулах үйлдвэр, эмнэлэгт нь чийрэгжүүлэх танхим байгуулж, Мөрөн суманд 10 ортой шинэ эмнэлгийн барилга, Өндөрхаан хотод аймгийн Нэгдсэн эмнэлгийн өргөтгөл, Эрүүл мэндийг дэмжих төв, Дэлгэрхаан суманд Батлан хамгаалахын сувиллын барилгууд барих ажээ. Дадал, Баянмөнх суманд соёлын төв, Цэнхэрмандал, Норовлин сум, Бэрх тосгонд сургууль, Өндөрхаан хотын 1-р сургуулийн өргөтгөл, Бор-Өндөр, Жаргалтхаан суманд шинэ цэцэрлэгийн барилгууд барихаар улсын төсөвт тусгагджээ. Галшар суманд сургуулийн дотуур байр, спорт заал шинээр барьж, бүх сургуулийн биеийн тамирын талбайг тохижуулах юм байна. Энэ онд аймгийн жижиг дунд үйлдвэрлэлийг дэмжих сан болон өрхийн аж ахуйг дэмжих сангаас иргэдэд нэг тэрбум төгрөгийн зээл олгож, Өндөрхаан хотод дулааны станц барьж эхлэн, биодизель, биогаз, нанобатарей үйлдвэрлэж, инновацийг дэмжих хөтөлбөрт 340 сая төгрөг зарцуулах юм байна. Түүнчлэн Өндөрхаан хотын зам гэрэлтүүлгийг улам сайжруулж 200 сая төгрөгийн ажил хийхийн зэрэгцээ Хэнтий аймаг орон нутгийн төсвөөсөө тэрбум шахам төгрөгийн хөрөнгө оруулалтын төсөл арга хэмжээ хэрэгжүүлэхээр төлөвлөөд байна.

Орон нутгийн төсвийн 327 сая төгрөгөөр Өндөрхаан хотын төвийн замыг шинэчилж, 100 сая төгрөгөөр соёл амралтын хүрээлэн байгуулан, Мөрөн сумын Өлзийт, Батширээт сумын Хурх багийн төв, Дархан, Цэнхэрмандал сумын ЗДТГ-ын конторын барилгыг шинээр барьж, Хэрлэнбаян-Улаан тосгоны конторыг засварлахаар боллоо. Энэ жил Өндөрхаан хотод Чингис хааны дурсгалын цогцолбор баригдаж эхэлнэ. Мөн Баянхутаг, Батширээт, Баян-Овоо, Дадал, Жаргалтхаан, Батноров сумын ЗДТГ-т автомашин худалдаж авах, Галшарын Хужиртын хийд, Өндөрхаан хотын усан бассейны барилгыг засварлах, Өндөрхаан хотын дулааны шугамыг хэсэгчлэн солих ажээ.

ШИНЭ ЦЭЦЭРЛЭГҮҮДЭЭ НЭЭЛЭЭ

Өнгөрсөн онд хэрэгжүүлсэн улсын төсвийн хөрөнгө оруулалтын сүүлчийн ажил болох Хэрлэн сумын 5-р багийн нутаг дэвсгэрт баригдсан 75 хүүхдийн шинэ цэцэрлэг өчигдөр үүдээ нээлээ. Энэ цэцэрлэг Хэрлэн сумын 5-р цэцэрлэгийн харъяа учир уг цэцэрлэгт нийт 175 хүүхэд хамрагдаж, 10 ажлын байр шинээр бий болжээ. Уг цэцэрлэгийн барилгыг улсын төсвийн 350 сая төгрөгийн хөрөнгөөр барьж ашиглалтанд оруулсан байна.

Эх сурвалж: Хэнтий аймгийн ЗДТГ-ын хэвлэл мэдээллийн алба