Шударга өрсөлдөөн хэрэглэгчийн төлөө газар иргэдээс ирсэн өргөдөл гомдлын дагуу Сууц өмчлөгчдийн холбоодуудад шалгалт хийжээ. Шалгалтын явцад нийтдээ 23 хэрэглэгч, оршин суугчдаас гомдол хүлээн авч тэдгээрийн 19-ийг нь шалгаж барагдуулсан бөгөөд гомдлын ихэнх хувийг байрны халаалт муу, халуун ус ихээр тасардаг, төлбөр, хураамжийг тодорхойгүйгээр нэмдэг зэрэг гомдол эзэлж байжээ.
Хяналт шалгалтын явцад тухайн СӨХ -ийн харьяалагддаг ОСНААК-ийн үйл ажиллагааны доголдол, дундын өмчлөлийн шугам сүлжээ ихээр муудсан байдал нь дулаан муу ирдэг, халуун хүйтэн ус байнга тасардаг зэрэг гомдлыг  ихээр дагуулж хэрэглэгчдийн бухимдалыг төрүүлдэг нь тогтоогдсон байна.
Улаанбаатар хотод байгаа ихэнх дундын өмчлөлийн шугам сүлжээ муудаж, эдэлгээ даахааргүй болсон бөгөөд байнгын засвар үйлчилгээ хийгддэг ч төдийлөн үр дүнгээ өгдөггүй байна. Мөн СӨХ-г байгуулахад иргэдийн оролцоо муу байдагтай холбоотойгоор хэдхэн хүний өнгө үзэмжээрээ холбоо байгуулагдаж, СӨХ-д оршин суугчдын хяналт, иргэдийн хөндлөнгийн оролцоогүйгээр үйл ажиллагаа явуулах боломжийг бүрдүүлж улмаар ямар нэг хууль бус үйл ажиллагаа эрхлэх нөхцлийг бүрдүүлдэг байна.
Хяналт, шалгалтын явцад ирүүлсэн гомдлын ихэнхи хувийг оршин суугчдаас хураан авч байгаа төлбөртэй холбоотой мэдээлэл зонхилж байгаа бөгөөд СӨХ-үүд нь СӨХДЗ-өөс жишиг байдлаар тогтоосон үнийг баримтлан лифт, цэвэрлэгээ, харуул, жижүүр, засвар үйлчилгээ, баримтын гэсэн цөөн тооны хураамж болох 3000 орчим төгрөг хураан авч түүнийгээ дундын өмчлөлийн халаалт, цахилгаанд болон үйлчлэгч, жижүүр, гүйцэтгэх захирал, ня-бо-гийн цалин хөлсөнд зарцуулдаг байна.
С.Намар