“Хот байгуулалтын баримт бичиг боловсруулах, барилга, байгууламжийн зураг төсөл боловсруулах, барилгын ажил гүйцэтгэх, материалын үйлдвэрлэл, өргөх байгууламж, түүний эд ангийн үйлдвэрлэл, угсралт, засвар үйлчилгээ, төмөр замын объект, байгууламж барих ажил эрхлэх тусгай зөвшөөрөл олгох ЖУРАМ”

      Нэг. Нийтлэг үндэслэл

 1.1. Энэхүү журмын зорилго нь Хот байгуулалтын баримт бичиг, барилга, байгууламжийн зураг төсөл боловсруулах, барилгын ажил гүйцэтгэх, материалын үйлдвэрлэл, өргөх байгууламж, түүний эд ангийн үйлдвэрлэл, угсралт, засвар үйлчилгээ эрхлэх, төмөр замын объект, байгууламж барих ажил эрхлэх хуулийн этгээдэд тусгай зөвшөөрөл /цаашид “тусгай зөвшөөрөл” гэх/ олгох, хугацааг сунгах, түдгэлзүүлэх, сэргээх, хүчингүй болгох, гэрчилгээг нөхөн олгохтой холбогдсон харилцааг зохицуулахад оршино.

                1.2. Энэхүү журамд заасан суурь нөхцөл шаардлагыг хангасан аж ахуйн нэгж, байгууллагад энэ журмын хоёрдугаар хавсралтад заасан ажлын төрлөөр тусгай зөвшөөрөл олгоно.

 1.3. Тусгай зөвшөөрлийг Барилгын асуудал эрхэлсэн Засгийн газрын гишүүний шийдвэрээр олгоно.

      Хоёр. Тусгай зөвшөөрөл олгоход шаардагдах баримт бичгийг бүрдүүлж, ирүүлэх

 2.1 Тусгай зөвшөөрөл шинээр авах, сунгуулахыг хүссэн аж ахуйн нэгж, байгууллага нь “Аж ахуйн үйл ажиллагааны тусгай зөвшөөрлийн тухай хууль”-ийн 11 дүгээр зүйлд

Зааснаас гадна энэхүү журмын нэгдүгээр хавсралтын дагуу холбогдох баримт бичгийг бүрдүүлж Барилгын асуудал эрхэлсэн төрийн захиргааны байгууллагад ирүүлнэ.

2.2. Тусгай зөвшөөрөл хүссэн аж ахуйн нэгж, байгууллага нь энэ журмын хоёрдугаар хавсралтад заасан тусгай зөвшөөрлийн суурь нөхцөл, шаардлагыг хангасан байна.

2.3. Тусгай зөвшөөрөл хүссэн аж ахуйн нэгж, байгууллага нь өргөдөлд дараахь баримт бичгүүдийг хавсаргаж ирүүлнэ. Үүнд:

2.3.1. Аж ахуйн нэгж, байгууллагын Улсын бүртгэлийн гэрчилгээний хуулбар, Гадаадын хөрөнгө оруулалттай аж ахуйн нэгжийн хувьд Гадаадын хөрөнгө оруулалтын газраас олгосон сертификатын хуулбар;

2.3.2. Аж ахуйн нэгж, байгууллагын сүүлийн улирлын санхүүгийн тайлан тэнцэл, аудитын дүгнэлтийн хамт;

2.3.3. Инженер, техникийн ажилтан нэг бүрийн диплом, гэрчилгээ, батламж, зөвлөх инженерийн гэрчилгээний хуулбар /тусгай дугаар бүхий нэрийн тэмдгийг дарж баталгаажуулсан байх/, мэргэшсэн инженерийн мэргэшлийн зэргийн гэрчилгээний хуулбар;

2.3.4. Машин механизм, тоног төхөөрөмж, тээврийн хэрэгслийн гэрчилгээний хуулбар, түрээсээр ашигладаг бол гэрээний хуулбар;

2.3.5. Орон нутгийн аж ахуйн нэгж, байгууллага бол тухайн газрын Газрын харилцаа, барилга, хот байгуулалтын газрын тодорхойлолт.

2.4. Тусгай зөвшөөрлийн хугацааг сунгуулах бол энэ журмын 2.3.1-2.3.5-д зааснаас гадна дараахь баримт бичгийг бүрдүүлсэн байна. Үүнд:

2.4.1. Барилгын норм, нормативын санд шимтгэл төлсөн баримт;

2.4.2. Захиалагч байгууллагаас гаргасан тодорхойлолт /2-3/;

                 2.4.3. Барилга байгууламж ашиглалтад оруулсан комиссын акт /1-3/;

                 2.4.4. Харъяалах татварын албаны тодорхойлолт;

                 2.4.5. Ашиглалтад хүлээлгэн өгсөн барилга байгууламжийн фото зураг;

                 2.5. Энэ журмын 2.3.1-2.3.3-т заасан баримт бичгийг нотариатаар баталгаажуулсан байна.

                 2.6. Машин механизм, тоног төхөөрөмж нь тухайн ажлыг гүйцэтгэхэд технологийн бүрдэл, тоо хэмжээ, ашиглалтын шаардлага хангасан байх ба 50-иас доошгүй хувь нь аж ахуйн нэгжийн өөрийн өмчлөлийн байна.

                 2.7.Тусгай зөвшөөрөл хүссэн аж ахуйн нэгж, байгууллага нь барилгын ажил явуулахад мөрдөх Үндэсний стандарт, норм норматив болон бусад техникийн баримт бичгийн иж бүрдэлтэй байна.

                2.8. Тусгай зөвшөөрөл хүссэн аж ахуйн нэгж, байгууллагын бүрдүүлж ирүүлсэн баримт бичгийн үнэн зөв болохыг аж ахуйн нэгж, байгууллагын захирал /дарга/ гарын үсэг зурж, тэмдэг дарж баталгаажуулсан байна.

                             Гурав. Өргөдөл хянан шийдвэрлэх ажиллагаа

                3.1. Барилгын асуудал эрхэлсэн төрийн захиргааны байгууллага нь тусгай зөвшөөрөл хүссэн аж ахуйн нэгж, байгууллагын ирүүлсэн өргөдлийг нягтлан үзсэний үндсэн дээр хүлээн авсан өдрөөс хойш “Аж ахуйн үйл ажиллагааны тусгай зөвшөөрлийн тухай хууль”-ийн 12 дугаар зүйлд заасны дагуу ажлын 21 хоногийн дотор   “Тусгай зөвшөөрөл олгох асуудлаар урьдчилсан дүгнэлт гаргах ажлын хэсэг” /цаашид “Ажлын хэсэг” гэх/-ийн хуралдаанаар хэлэлцүүлж шийдвэрлүүлнэ.

               3.2. Ажлын хэсгийг  Барилгын асуудал эрхэлсэн төрийн захиргааны төв байгууллагын шийдвэрээр байгуулна.

               3.3. Ажлын хэсэг тусгай зөвшөөрөл хүссэн өргөдлийг хянан хэлэлцээд олгох эсэх талаар дүгнэлт гаргаж, гаргасан дүгнэлтээ тушаалын төслийн хамт Барилгын асуудал эрхэлсэн Засгийн газрын гишүүнд танилцуулж шийдвэрлүүлнэ.      

               3.4. Төмөр замын объект, байгууламж барих ажил эрхлэх тусгай зөвшөөрлийн талаар Ажлын хэсэг гаргасан дүгнэлтээ “Төмөр замын тээврийн тухай хууль”-д заасны дагуу төмөр замын асуудал эрхэлсэн төрийн захиргааны байгууллагад хүргүүлнэ.

               3.5. Тусгай зөвшөөрлийн гэрчилгээг бичиж олгох, тусгай зөвшөөрөл эзэмшигчтэй гэрээ байгуулах ажлыг барилгын асуудал эрхэлсэн төрийн захиргааны байгууллага зохион байгуулна. Энэ журмын 3.4 дэх заалтын дагуу гаргасан Ажлын хэсгийн дүгнэлтийг үндэслэн тусгай зөвшөөрөл олгох шийдвэр гаргах, тусгай зөвшөөрлийн гэрчилгээ олгох, гэрээ байгуулах ажлыг төмөр замын асуудал эрхэлсэн төрийн захиргааны байгууллага хариуцан зохион байгуулна.

Дөрөв. Тусгай зөвшөөрөл олгох

              4.1 Тусгай зөвшөөрлийн суурь нөхцөл шаардлагыг хангасан аж ахуйн нэгжид тусгай зөвшөөрлийн гэрчилгээг “Аж ахуйн үйл ажиллагааны тусгай зөвшөөрлийн тухай” хуулийн 6 дугаар зүйлийн 6.1-д заасан хугацаагаар олгоно.    

              4.2. Энэхүү журмын хоёрдугаар хавсралтаар баталсан 2.1.2 ажлын төрлөөр тусгай зөвшөөрөл олгосон тохиолдолд 2.1.1 ажлын төрлөөр, 2.1.3 ажлын төрлөөр олгосон тохиолдолд 2.1.2 ажлын төрлөөр, 2.1.4ажлын төрлөөр олгосон тохиолдолд 2.1.3 ажлын төрлөөр, 2.1.6 ажлын төрлөөр олгосон тохиолдолд 2.1.5 ажлын төрлөөр тусгай зөвшөөрөл олгосонд тооцно.

             4.3. Тусгай зөвшөөрөл олгосон шийдвэр гарсан тохиолдолд Барилгын асуудал эрхэлсэн төрийн захиргааны байгууллага тусгай зөвшөөрөл эзэмшигчтэй гэрээ байгуулна.

            4.4. Тусгай зөвшөөрөл хүссэн аж ахуйн нэгж, байгууллагын өргөдлийг Ажлын хэсэг хэлэлцээд тусгай зөвшөөрөл олгох боломжгүй гэсэн дүгнэлт гаргасан тохиолдолд “Аж ахуйн үйл ажиллагааны тусгай зөвшөөрлийн тухай хууль”-ийн 12 дугаар зүйлийн 12.2-д заасны дагуу бичгээр хариу өгнө.

            4.5. Тусгай зөвшөөрлийн гэрчилгээг хаяж үрэгдүүлсэн, хулгайд алдсан, үнэт цаасны хувьд ашиглах боломжгүй гэмтээсэн зэргээс нөхөн олгох хүсэлт гаргасан тохиолдолд эдгээрийг нотолсон баримт бичгийг үндэслэн Ажлын хэсгийн хуралдаанаар хэлэлцэж шийдвэрлэнэ.

           4.6. Тусгай зөвшөөрөл авсан аж ахуйн нэгж, байгууллага нь 1-ээс дээш жилийн хугацаанд тусгай зөвшөөрөлд заасан үйл ажиллагааг явуулсны дараа энэхүү журмын 2 дугаар хавсралтад заасан өөр ажлын төрлөөр тусгай зөвшөөрөл авах хүсэлт гаргаж болно.           

                                     Тав. Тусгай зөвшөөрлийн хугацааг сунгах

            5.1. Тусгай зөвшөөрлийн хүчинтэй байх хугацаа дуусахаас ажлын 30-аас доошгүй хоногийн өмнө тусгай зөвшөөрөл эзэмшигч нь сунгуулах тухай хүсэлтээ гаргасан байна.

            5.2. Аж ахуйн нэгж, байгууллага нь тусгай зөвшөөрлийн хугацааг сунгуулах хүсэлтийг гаргахдаа дараахь шаардлагыг хангасан байна. Үүнд:

             5.2.1. Гэрээний үүргээ зохих ёсоор биелүүлсэн, гэрээний биелэлтийг хугацаанд нь дүгнүүлсэн, гэрчилгээнд тэмдэглэл хийлгэсэн байх;

             5.2.2. Барилгын тухай хуулийн 16 дугаар зүйлийн 16.1.2, Барилга, хот байгуулалтын сайдын 2008 оны 121 дүгээр тушаалаар баталсан “Барилгын норм, норматив боловсруулах санг бүрдүүлэх, зарцуулах журам”-ын дагуу норм нормативын санд шимтгэл төлсөн байх;

             5.2.3.Тусгай зөвшөөрөл эзэмшигч нь тайлан мэдээгээ гэрээнд заасан хугацаанд нь тогтмол ирүүлсэн байх;

            5.4.Тусгай зөвшөөрөл эзэмшигч нь ямар нэгэн зөрчил дутагдалгүй, тухайн салбарт тогтвортой ажиллаж 3 ба түүнээс дээш удаа тусгай зөвшөөрлийн хугацааг сунгуулсан тохиолдолд дараагийн удаад 5 ба түүнээс дээш жилээр сунгаж болно.

             5.5. Тусгай зөвшөөрөл сунгуулах хүсэлтийг хугацаа хоцорч өгсөн нь “Барилгын норм, норматив боловсруулах санг бүрдүүлэх, зарцуулах журам”-ын дагуу норм нормативын санд хөрөнгө төвлөрүүлэхгүй байх үндэслэл болохгүй.

Зургаа. Тусгай зөвшөөрөл түдгэлзүүлэх, сэргээх

           6.1.       Тусгай зөвшөөрлийг түдгэлзүүлэх, сэргээх асуудлыг Аж ахуйн үйл ажиллагааны тусгай зөвшөөрлийн тухай хуулийн 13 дугаар зүйлд заасны дагуу шийдвэрлэнэ.

Долоо. Тусгай зөвшөөрөл хүчингүй болгох

            7.1. Дор дурдсан нөхцөл байдал үүссэнийг нотолсон эрх бүхий байгууллагын санал, дүгнэлтийг үндэслэн тусгай зөвшөөрлийг хүчингүй болгох асуудлыг шийдвэрлэнэ. Үүнд:

           7.1.1. “Аж ахуйн үйл ажиллагааны тусгай зөвшөөрлийн тухай хууль”-ийн 14 дүгээр зүйлд заасан тохиолдол бий болсон;

           7.1.2.   “Барилгын тухай хууль”-ийн 14 дүгээр зүйлийн 14.5-д заасан нөхцөл байдал үүссэн;

           7.1.3. Тусгай зөвшөөрөл эзэмшигч нь Барилгын асуудал эрхэлсэн төрийн захиргааны байгууллагатай байгуулсан гэрээгээр хүлээсэн үүргээ биелүүлээгүй

          7.2. Тусгай зөвшөөрлийг хүчингүй болгосон шийдвэрийн талаар хэвлэл мэдээллийн хэрэгслээр нийтэд мэдээлж, харъяалах татварын албанд “Аж ахуйн үйл ажиллагааны тусгай зөвшөөрлийн тухай хууль”-ийн 14 дүгээр зүйлийн 14.2-д заасан хугацаанд бичгээр мэдэгдэнэ.

          7.3. Барилга угсралтын ажил гүйцэтгэх явцад барилгын холбогдох норм, дүрэм, стандартыг зөрчсөн, технологийн алдаа гаргасны улмаас хүний амь нас, эрүүл мэнд, бусдын эд хөрөнгөд хохирол учруулсан тохиолдолд тухай аж ахуйн нэгж, байгууллагын тусгай зөвшөөрлийг хүчингүй болгож, дахин олгохгүй.

Найм. Бусад зүйл

         8.1. “Барилгын тухай хууль”-ийн 14 дүгээр зүйлийн 14.11-д заасны дагуу Барилгын асуудал эрхэлсэн төрийн захиргааны байгууллага нь тусгай зөвшөөрөлтэй холбогдсон мэдээллийн санг бүрдүүлнэ. Тусгай зөвшөөрөлтэй холбогдсон мэдээлэл олон нийтэд ил тод, нээлттэй байна.

         8.2. Тусгай зөвшөөрөл эзэмшигчтэй гэрээ байгуулах, гэрээний биелэлтэд хяналт тавих, дүгнэх, тайлан мэдээ гаргах, хяналт-шинжилгээ үнэлгээ хийх, “Барилгын тухай” хуулийн 14 дүгээр зүйлийн 14.7-д заасны дагуу тусгай зөвшөөрөл эзэмшигчийн зэрэглэл тогтоох, эдгээрийн үр дүнг Барилгын асуудал эрхэлсэн төрийн захиргааны төв байгууллагад тайлагнах ажлыг Барилгын асуудал эрхэлсэн төрийн захиргааны байгууллага хариуцна.