Оросын их яруу найрагч А.Блок "Хүйтэн булш цэцэглэж ургасан хөөрхий орос орон минь" хэмээн бичсэн байдаг юм.

Ингэж бичсэний үр дүнд Орос орон утга учиргүй хөшөө дурсгалаа цөөлж чадсан гэдэг. Сүүлийн үед хөшөө, дурсгал, суваргын төлөөх уралдаан болж байна гэхэд хилсдэхгүй. Улаанбаатар хотод хэнийх ч мэдэхгүй хөшөө, барималууд элбэг. Түүхэнд гүйцэтгэсэн алдар гавьяагаар тааруу нөхдүүдийн хөшөө босох болов. Урваач, шарваач, авлигач этгээдүүдийн хөшөө ч босох болжээ. Аймаг сум бүхэн үр дүн муутай хэн нэгний хөшөөгөөр төв талбайгаа чимэх болсон байх юм. "Соц" үеийн болоод зах зээлийн нийгмийн хөшөөнүүд чихэлдэж ургалаа. Чингэс хаан, ардын хувьсгалын баатрууд нэг нэгнээ ад шоо үзсэн мэт зэр зэвсэгээ агсан үзэгдэх аж. Ер нь мөнгө төгрөгтэй эрхмүүд аав ээжийнхээ хөшөөг аймаг сумын төвөөрөө дүүргэх шинжтэй. Үүнээс гадна суварга хэмээх шашны холбогдолтой барималууд уулын орой болгон дээр босдог болжээ.

Морь, мал, ан гөрөө, нохойноос эхлээд бэлэг эрхтэний хөшөө хүртэл босдог болсон. Иймэрхүү хөшөө, буяны суваргыг авлига болон хууль бусаар хөрөнгөжсөн нөхдүүд босгодог юм билээ. Талийгаачийн оршуулгын тэмдэг болгон хөшөөг босгодог түүхтэй. Тэгэхээр оросын их найрагчийн хэлсэнчлэн "Хүйтэн булш цэцэглэн ургаад" байна уу даа гэмээр. Улаанбаатар хотын хөшөө дурсгалд стандарт тогтоож өгөхгүй бол оршуулгын газраар яваад байгаа мэт сэтгэгдэл төрөхөөр болж мэдэх юм.