Шинэ бүтээн байгуулалт 100,000 хөтөлбөр юу болж байна

Шинэ бүтээн байгуулалт 100,000 хөтөлбөр юу болж байна

    МУ-ын Засгийн газраас гэр хорооллыг орон сууцжуулах хөтөлбөрийг зарласанаас хойш багагүй хугацааг үдэж байгаа билээ. Гэвч энэ хөтөлбөрийн хэрэгжилт ямархуу түвшинд яваа, үнэхээр хэрэгжих үгүй нь иргэдэд тодорхой биш байсаар байна. Уг нь 2000 - 2016 онуудад орон сууцны 6-р хорооллыг барих ерөнхий төлөвлөгөө нь гарсан. Үүнд Буянт-Ухаа, Баянголын ам, яармагт баригдах орон сууцны хороолол гээд 2016 он гэхэд нийт 24650 айлын орон сууц барих боломжтой гэсэн техник эдийн засгийн үндэслэлтэй, зураг төслийн ажлыг гүйцэтгэсэн гэж Нийслэлийн барилга хот байгуулалт, төлөвлөлтийн газрын хот байгуулалтын хэлтсээс мэдээлж байгаа юм.
      Шинэ бүтээн байгуулалт хөтөлбөрийг удаашруулж байгаа нэг асуудал нь газар чөлөөлөлтын асуудал. Иргэн Доржийн газрыг төр худалдаж авий гэхлээр төрөөс гаргасан газрын үнэлгээнээс өндөр төлбөр нэхдэг. Мөн зарим хашаанд 2-3 айл байдаг. Гэвч нэг айлд нь л тухайн газрыг өмчлөх гэрчилгээ байдаг, харин тэдгээр айл өрхүүд хамтарч жижиг дунд бизнес эрхэлж өрхийн орлогоо нэмэгдүүлдэг учраас орлогын эх үүсвэр нь хаагдах гэх мэт олон бэрхшээлтэй асуудлаас болж газар чөлөөлөлт удаашралтай байгаа гэж мэргэжлийн байгууллагынхан тайлбарлаж байгаа юм. Тэгэхлээр энэ бүхэнд таарсан үнэлгээний асуудлыг цэгцлэх хэрэгтэй. Гэвч энэ бүхнийг зохицуулсан хууль гаргая гэхлээр манай улсын 11 хуультай зөрчилдөж байна гэсэн судалгааг Японы Жайка байгууллагаас гаргасан байна. Тийм учраас төрийн түшээдийн өмнө энэ бүхнийг даруйхан цэгцлэх үүрэг хариуцлага оногдож байна.
      Иргэд уг хөтөлбөрт хамрагдая гэхлээр төлбөрийн асуудал хана босгож орхино. Өнөөдөр Монголчуудын хэдэн хувь нь сар бүр банкны зээл төлөөд байх хэмжээний орлоготой байгаа билээ. Дээр нь арилжааны банкнуудын хүү хэд байгаа билээ. Засгийн газрын хуралдаанаар 800 тэрбум төгрөгийн бонд гаргаад 300-г нь орон сууцны зээлд 6%-ийн хүүтэйгээр иргэдэд хэрхэн хүргэх талаар дахин хэлэлцэж байна. Гэсэн ч банкууд 14-16%-ийн хүүгээ огцом буулган 6%-д хүргэх болов уу? бодох л асуудал. Шинэ бүтээн байгуулалтын эхлэл 40,000 айлын орон сууц хөтөлбөр ОССК-аар дамжин хэрэгжиж байсан бол 100,000 айлын орон сууц арилжааны 11 банк болон төв банк хамтран МИК гэсэн урт хугацаатай орон сууцны зээлийг олгох зорилгоор байгуулсан энэ байгууллага банкуудын иргэдэд олгосон зээлийг дахин санхүүжүүлэх эх үүсвэрийг бий болгох зорилготой бөгөөд зээлийн хүүг бууруулах талаар ажиллах тал дээр оролцон ажиллах бололтой.
    Засгийн газрын зарлаад байгаа 6%-ийг Монгол улсын иргэн бүр авахгүй 120 сая төгрөгний байр авах гэж байгаа болон өмнө нь зээл авч байсан иргэд энэ зээлийг авах эрхгүй. Ийм хувьтай зээлийг анх удаагаа зээл авах гэж байгаа хүн болон залуу гэр бүлүүд орох бөгөөд доогуур түвшиний орлоготой иргэд бас л сугарч үлдэх шинжтэй. Хэрвээ Засгийн газар энэ мөнгийг ОССК-аар дамжуулан олговол нэг удаагийн зээл болоод дуусах бөгөөд МИК- ээр дамжуулан олговол дараа дараагийн зээлийн эх үүсвэр тавигдах боломжтой гэж мэргэжлийн хүмүүс үзэж байгаа юм.
Тэгэхээр хамгийн зөв гарцыг сонгох сонголт Засгийн газрын гарт байгаа бололтой.   
 
 

 

Холбоотой мэдээ