Монгол Улс Азийн авто замын сүлжээнд 2004 онд нэгдэн орж, Чойр-Замын Үүд чиглэлийн 432 км, Ховдын Ярантаас Улаанбайшинт чиглэлийн 731 км авто замыг барьж байгаа билээ. Энэ хүрээнд Азийн авто замын сүлжээнд холбогдсон авто замыг барьж, сайжруулах талаар Монгол Улсын Засгийн газар үе шаттай арга хэмжээ авч хэрэгжүүлж байгаагаас Баруун бүсийн босоо тэнхлэгт авто замын санхүүжилт дутсан авто замыг бүрэн дуусгах зорилгоор АХБ-тай хамтран хэрэгжүүлэх “Баруун бүсийн босоо тэнхлэгийн авто замыг хөгжүүлэх хөрөнгө оруулалтын хөтөлбөр”-ийн Санхүүжилтийн ерөнхий хэлэлцээрт Сангийн сайд С.Баярцогт, АХБ-ны суурин төлөөлөгч ноён Роберт Гоэлхаммер нар гарын үсэг зурлаа.

Тус хөрөнгө оруулалтын хөтөлбөрийг АХБ-ны 170 сая ам.доллар, Монгол Улсын Засгийн газрын 92 сая ам.долларын хөрөнгөөр 3 үе шаттайгаар хэрэгжүүлнэ. Хөтөлбөрийн хүрээнд нийт 293 км хатуу хучилттай авто зам, бүрэн тоноглогдсон засвар арчлалтын 3 төв, орон нутгийн 34,9 км зам, 3 гүүрний барилгын ажлыг хийхээс гадна салбарын чадавхийг бэхжүүлэх, институцийг сайжруулах ажлыг үе шаттайгаар гүйцэтгэнэ.

Сангийн сайд энэхүү ёслолын арга хэмжээний үеэр хэлсэн үгэндээ: Энэхүү баруун бүсийн босоо тэнхлэгийн  авто замыг барьснаар Монгол Улс өөрийн нутаг дэвсгэрээрээ дамжуулан ОХУ, БНХАУ-ыг авто замаар холбох төдийгүй манай улсын баруун бүс нутгийн нийгэм, эдийн засгийг эрчимтэй хөгжүүлэх, хөрш зэргэлдээ улсуудын дамжин өнгөрөх зорчигч, ачаа тээвэрлэлтийг хамгийн дөт замаар хийх боломжийг бүрдүүлж, бүс нутгийн ач холбогдол бүхий үр ашигтай, аюулгүй байдлыг хангасан авто замтай болно гэдгийг онцоллоо.

Азийн хөгжлийн банкны Төв Азийн бүс нутгийн эдийн засгийн хамтын ажиллагааны хөтөлбөр (CAREC)-ийн хүрээнд бүс нутгийн чанартай бүтээн байгуулалтын энэхүү том төслийг Азийн хөгжлийн банкны буцалтгүй тусламж, хөнгөлөлттэй зээл, арилжааны зээл зэрэг холимог санхүүгийн эх үүсвэрээс санхүүжүүлэн хэрэгжүүлэхээр АХБ-тай анх удаа Санхүүжилтийн ерөнхий хэлэлцээрийг байгуулж байгаа юм.