Хотын төвд утаа үйлдвэрлэгчидтэй хатуу тэмцэнэ

Хотын төвд утаа үйлдвэрлэгчидтэй хатуу тэмцэнэ

Нийслэлийн агаарын бохирдлын дийлэнх хэсгийг гэр хороолол, мөн автомашин, том жижиг уурын зуухууд бүрдүүлж буй. 2011-2012 онд нийслэлийн агаарын бохирдлыг 30 орчим хувиар бууруулах зорилго тавьж, гэр хорооллын айл өрхийг бүсчлэн бүрэн шаталттай зуух, шахмал түлшээр ханган, бага оврын уурын зуухнуудыг татан буулгаж, төвлөрсөн халаалтын шугамд холбох гээд агаарын бохирдлыг бууруулж болох боломжит бүхий л аргыг эрэлхийлж байгаа. Гэвч нөгөө талаас энэ ажилд аж ахуйн нэгжүүдийн оролцоо бага, харин ч бохирдолд нэрмээс болж байгаа учир цаашид авах арга хэмжээг чангатгах нь зүйтэй гэж хотын удирдлагууд үзсэн байна.
Хөрөнгө санхүүгийн боломжтой гэж нийслэлээс газрын зөвшөөрөл авч барилгын ажил эхлүүлдэг хэрнээ ажилчдын байр, манаачийн гэр, хоолны газрууд нь түүхий нүүрс хэрэглэдэг нөхцөл байдал өнөөдрийн барилгын компаниудын дүр зураг болоод байгаа. Боловсруулсан түлш хэрэглэх, эсвэл утаа бага гаргадаг зуухаар хангах, бүр цахилгаанд холбож эдгээр асуудлаа шийдчих боломж тэдэнд бүрэн бий. Тиймээс эхний ээлжинд барилга барьж байгаа ААН болон жижиг дунд бизнес эрхлэгчдийг түүхий нүүрс түлүүлэхгүй байх шийдвэрийг гаргаснаа Нийслэлийн Засаг даргын нэгдүгээр орлогч Б.Баатарзориг дуулгалаа.
“Өөрсдийнхөө үйл ажиллагаанд шаардлагатай бүхий л дэмжлэгийг хотоос авдаг хэрнээ эргээд хотынхоо бодлого шийдвэрийг хэрэгжүүлэх талаар сэтгэл гаргахгүй байгаа нөхдүүдтэй тооцох хариуцлагыг чангатгана. Шаардлага биелүүлэхгүй бол хуулинд заасны дагуу торгох арга хэмжээ ав. Бүр болохгүй бол төрийн бодлогыг дэмжихгүй байгаа нөхдүүдийн ААН-ийн үйл ажиллагаа явуулах эрхийн зөвшөөрөлтэй нь хүртэл ярих арга хэмжээ авна” гэдгээ хотын нэгдүгээр орлогч анхааруулсан байна.
Нийслэлийн Мэргэжлийн хяналтын газраас өнгөрсөн 7 хоногт агаарын бохирдлыг бууруулахад сөрөг нөлөө үзүүлж болзошгүй ААН-ийн судалгааг дүүрэг бүрээр гаргаж, 300 гаруй объектод мэдэгдэх хуудас хүргүүлсэн байна. Үүний үр дүнд 150 объект түүхий нүүрс түлэхгүйгээр цахилгаанд холбогдож халаалтынхаа асуудлыг шийджээ. Үлдсэн ААН-дэд энэ долоо хоногт хяналт, шалгалтыг эрчимтэй явуулж, ирэх 1 дэх өдрийн шуурхай зөвлөлгөөн дээр дүнг танилцуулахыг тэрбээр холбогдох албаныханд үүрэг болгосон юм.

Холбоотой мэдээ