Оюутны хотхоныг Шивээтийн хөндийд барихгүй ч байж магад

Оюутны хотхоныг Шивээтийн хөндийд барихгүй ч байж магад

Удтал яригдсан оюутны хотхоны ажилд зарим хүндрэл гарчээ. Оюутны хотхоныг байгуулах Налайх дүүргийн Шивээтийн хөндийд олгогдсон талбай нь цэвдэгтэй тул энэ нь барилгын өртгийг нэмэгдүүлэх магадлалтай байгаа гэнэ. Тэр ч бүү хэл үүнээс шалтгаалан тухайн газарт барих эсэх талаар ярилцаж буй гэдгийг БСШУ-ны сайд С.Отгонбаяр хэллээ.

Өдгөө нийслэл хотод дээд боловсрол олгох төрийн болон хувийн хэвшил, гадаадын сургуулиудын салбар нийт 99 сургуульд 140 орчим мянган суралцагч суралцаж байна.

Үүнээс Налайх дүүрэгт орших Шивээтийн хөндийн 2000 гаруй га талбайд төрийн өмчийн 5 их сургуулийн 81.6 мянган оюутан сурагч, 5.82 мянган багш ажиллагсад, ШУА-ийн зургаан хүрээлэнгийн 330 орчим ажиллагсад ажиллах эхний санал ирүүлжээ. Ерөнхийдөө тус оюутны хотхонд 150 мянга гаруй хүн ажиллаж амьдарна гэж тооцож байгаа юм байна.

Энэ ажилд ойролцоогоор 400-500 сая ам.доллар шаардлагатай гэх урьдчилсан тооцоо гарсан бөгөөд санхүүжилтийг Улаанбаатар хотын А бүсийн их, дээд сургуулийн барилгын газар, талбайг дуудлагаар худалдаалж олохоос гадна Хятадын Засгийн газраас үзүүлж буй буцалтгүй тусламж, бусад хөнгөлөлттэй зээлээс бүрдүүлэхэээр тооцоолжээ. Худалдах барилгын хувьд МУИС, Боловсролын их сургуулийн А байр гэх мэт түүхэн барилгуудыг харин хамруулахгүй ажээ.

Холбоотой мэдээ