ЗТБХЯ, ОССК, Газрын харилцаа, барилга геодези, зурагзүйн газар болон "Монголын ахмад барилгачдын холбоо"-оос хамтран "Шинэ бүтээн байгуулалт ба барилгын салбар" сэдэвт хэлэлцүүлгийг зохион байгууллаа.

Дээрх хэлэлцүүлгээр "Шинэ бүтээн байгуулалт" дунд хугацааны зорилтот хөтөлбөр, түүнд тулгамдаж байгаа асуудлын талаар болон гарах гарцыг хамтдаа зөв зүйтэй тодорхойлохыг зорьсон юм.

Тэнгэрт тулсан үнээрээ иргэдийг дарамталж байсан орон сууцны үнэ бага ч гэсэн буурах бололтой. Учир нь өчигдөр зохион байгуулсан хэлэлцүүлгийн үеэр ЗТБХБ-ын сайд Ц.Дашдорж "100 мянган айлын орон сууц" хөтөлбөрт хамрагдсан орон сууцны м/кв-ийн үнийг 910-1.1 сая төгрөг болгох шийдвэр гаргаснаа мэдэгдсэн юм.

ОССК-ийн барьж байгаа "Буянт-Ухаа" цогцолборт хийсэн судалгаагаар гүйцэтгэгчийн ашиг болон бусад зардлаа тооцож үзэхэд м/кв-ийнх нь үнэ 850 мянган төгрөг байгаа гэнэ. Хэдийгээр барилгын компаниудын зардал харилцан адилгүй боловч дээрх хөтөлбөрт хамрагдах орон сууцны м/кв-ийн үнэ 980-1.1 сая төгрөг байх боломжтой аж.

Нөгөөтэйгүүр барилгын хамгийн чухал 550 нэр төрлийн бараа бүтээгдэхүүнд хийсэн судалгаан дээр үндэслэн индексжүүлснээр дээрх үнийг тогтоосон байна. Энэ шаардлагыг зөвшөөрөх барилгын компаниуд Газрын харилцаа, барилга геодези, зурагзүйн газартай гэрээ байгуулах бөгөөд үнэ хөөрөгдөж байгаа болон өндөр үнэ санал болгож буй компаниудыг "100 мянган айлын орон сууц" хөтөлбөрт хамруулахгүй гэдгээ хэлэлцүүлгийн үеэр сайд мэдэгдсэн юм.

Түүнчлэн эхний ээлжинд 70 гаруй компани 69 мянган айлын орон сууц барих төсөл хөтөлбөрийг агентлагт ирүүлээд байгаа аж. Дээрх компаниудыг орон сууц барих инженер, техникийн асуудлаа шийдвэрлэсэн гэж үзсэний үндсэн дээр гэрээ байгуулсан аж.

Улаанбаатар хотын болон аймгуудын хэмжээнд дулааны эх үүсвэрийн асуудлыг яаралтай шийдвэрлэхгүй бол орон сууцжуулах ажил удаашрах магадлалтай гэнэ. Нөгөөтэйгүүр одоогийн ДЦС-ууд 7-8 сая тонн нүүрс хэрэглэж байгаа бөгөөд ДЦС-5 ашиглалтад орвол дулааны эх үүсвэрийн тодорхой хувь нь шийдвэрлэгдэх боломжтой аж.

Түүнчлэн өнгөрсөн хоёрдугаар сараас хойш барилгын материалын эрэлт эрс өссөн төдийгүй нийлүүлэлт нэмэгдэхээр үнэ нь буурна гэж найдаж байгаагаа сайд онцолсон. Мөн ирэх долоо хоногоос банкууд зээл олгож эхлэх учраас эхний ээлжийн хүмүүс байр худалдан авах боломж бүрдэх юм байна.

Энэхүү тушаалыг удахгүй батлах гэнэ. Ямартай ч дээрх хөтөлбөрт хамрагдсан орон сууцны м/кв-ийн үнийг тогтоох нь. Харин сайдын амласнаар орон сууцны үнэ цаашдаа буурах эсэх нь эргэлзээтэй юм. Нөгөөтэйгүүр барилгын компаниудын хэд нь дээрх үнийн саналыг зөвшөөрч гэрээ байгуулах нь сонирхол татаж байна.

Х.Өнөржаргал