Сүүлийн нэг жилийн дотор орон сууцны үнэ бараг нэг дахин нэмэгдчихээд байгаа. Хэдийгээр бага, дунд орлоготой иргэдэд зориулж Засгийн газраас “Шинэ бүтээн байгуулалт” дунд зорилтот хөтөлбөрийг баталж, түүний хүрээнд 2011-2016 он хүртэл  хэд хэдэн томоохон бүтээн байгуулалтыг өрнүүлэхээр болсны нэг нь “100 мянган айлын орон сууц” төсөл. Уг төслийг хэрэгжүүлэхээр Засгийн газар бага, дунд орлоготой иргэдийг орон сууцжуулахын тулд  жилийн зургаан хувийн хүүтэй зээл гаргах журмыг баталсан  билээ.

     Уг зээл Монголын  олон мянган  өрхөд итгэл төрүүлсэн шигээ хэрэгжилт удаан хүлээлт үүсгэсэн. Энэ ажлыг түргэсгэх, тулгарч байгаа асуудлуудаа ярилцахын тулд барилгынхан болоод салбар хариуцсан яам, болон төрийн бус байгууллагынхан өчигдөр “Шинэ бүтээн байгуулалт ба барилгын салбар” хэлэлцүүлэгийг зохион байгуулсан. Уг уулзалтаар ч салбарын сайд тэнгэрт хадчихаад байгаа орон сууцны үнийг зохицуулахаар болж орон сууцны үнийг 900,000- 1,000,181 төгрөг байхаар шийдвэрлэж тушаалыг нь өнөөдөр батлах тухайгаа хэлэлцүүлэгийн үеэр хэлсэн.

БАРИЛГЫН ТУСЛАХ АЖИЛТНААР АЖИЛЛАХ ХҮН ОЛДОХГҮЙ БАЙНА

      Компаниудын хувьд тулгамдаж байгаа гол асуудлуудын нэг нь барилгын туслах ажилтан гэнэ. Барилгын туслах ажилтанд өдрийн 20 мянган төгрөгийн цалин өгнө гэсэн зар тавиад ч хүн олддоггүй. Олдсон нэг нь цалингаа голох эсвэл ажилд орлоо гэхэд хариуцлага алдаж, хулгай хийдэг, архи уудаг, ажил тасалдаг.

     Тэгэхээр мэргэжилтэй ажилчин олноор бэлтгэхгүй  бол барилгын салбар ажиллах хүчний дутагдалд орох нь ээ гэдгийг уг уулзалтаар хөндсөн. Засгийн газраас иргэдээ зүгээр мөнгө өгч халамжилсаны үр дүнд иргэдийн дунд ажил хийх сонирхол нэлээд буурсан. Өдрийн 20 мянган төгрөгийн цалинтай ажил голоод байгаа хэрнээ сард өгдөг 21 мянган төгрөгийг өдөр шөнөгүй оочерлож дугаарлан, хэрүүл шуугиан болж авдаг. Баахан бакалаврын зэрэгтэй боловсон хүчин бэлтгэдэг, тэд нь ажил голоод хийдэггүй. Ер нь сүүлийн үед сургууль төгсч байгаа залуус төрийн алба тэр дундаа оффист суухыг илүүд үздэг болсон нь нууц биш. Үүнийг ахмад барилгачид багагүй шүүмжилсэн.

 

     Үндэсний үйлдвэрлэлийн хүчин чадал  барилга угс­рал­тынхаа ажлыг гүй­цэхгүй байгаад барилгын компаниудын төлөөлөлүүд шүүмжлэлтэй хандаж байсан юм. Үндэсний үйлд­вэр­лэлээ дэмжих нэрээр хил гаалиар орж ирж буй  барилгын мате­риалын гаалийн татва­рыг нэмэх бус өөр асуудлаар зохицуулах  хэрэгтэй байгааг ч барилгынхан учирлав. Үндэсний үйлдвэрээ дэмжээд үйлдвэрлэсэн материалыг нь худал­даж авья  гэхээр Нэг­дүгээрт: Үнэ нь өндөр, Хоёрдугаар: Чанар муу­тай байдаг. Тэгэ­хээр төр засаг үн­дэсний үйлдвэрийн бү­­тээг­­дэхүүнийг чанар­­­жуулах, үнийг нь буу­руулахад анхаарч байж дотоодын үйлдвэрүүд хөгжих боломжтой гэсэн саналыг гаргасан.