Иргэд хэр хурдан газраа чөлөөлнө, бүтээн байгуулалт тэр эрчээр сүндэрлэнэ

Иргэд хэр хурдан газраа чөлөөлнө, бүтээн байгуулалт тэр эрчээр сүндэрлэнэ

 

      Нийслэлийг барилгажуулах их бүтээн байгуулалтын ажил эхлээд багагүй хугацаа өнгөрч байна. Гэтэл газраа чөлөөлөхгүй, тэнгэрт хадсан үнэ хэлж, нийслэлийн барилгажилтад саад хийж байгаа хүн ч байна.
Тодруулбал, газрыг өмчлөгч, эзэмшигчид барилгын компаниудтай харилцан тохиролцсоны үндсэн дээр газраа чөлөөлж өгөх юм. Орон сууц санхүүжилтийн корпорацийн иргэдтэй тохиролцож газар чөлөөлж байгаагаас үзвэл 400 метр квадрат талбайтай бол нэг өрөө байр, 700 метр квадрат хүртэл бол хоёр өрөө байр гэх мэтээр тохиролцож байгаа аж. Харин иргэн өөрийн хүсэлтээр газраа зарж, мөнгөө бэлнээр нь авах боломж ч бий юм. Тиймээс нэг айлын газрыг дунджаар 40-50 сая төгрөгөөр үнэлэхээр төлөвлөжээ.

     Иргэдээ орон сууцжуулах цаашлаад хотыг утаагүй болгоход чиглэсэн “100 мянган айлыг орон сууцжуулах хөтөлбөр”-ийн хүрээнд чамгүй олон ажил хийгдэж байна. Тодруулбал, Монгол Улсын Засгийн газар “100 мянган айлын орон сууц” хөтөлбөрийн хүрээнд орон сууцны зээлийн хүүг бууруулах зорилго тавьж, эхний ээлжинд орон сууцны зээлийн хүүг 6 хүртэлх хувиар бууруулахаар болсон.
Үнэнийг хэлэхэд гэр хороололд дийлэнхдээ орлого багатай, ажилгүй иргэд амьдардаг. Тиймээс Засгийн газар, Нийслэлийн Засаг даргын Тамгын газраас эдгээр иргэдээ дэмжих зорилгоор орон сууцжуулах хөтөлбөрийг эхлүүлсэн гэж болно. Нэг ёсондоо энэ нь бага орлоготой иргэддээ боломж олгож байгаа явдал юм. Иргэд энэ алтан боломжийг алдаж болохгүй.
      “Хот байгуулалт буулгахаас эхэлнэ” гэж Хятадууд ярьдаг юм билээ. Бид ч энэ лоозонг Улаанбаатарыг барилгажуулах ажлынхаа уриа болгоход болохгүй гэх газаргүй. Нийслэлийн хуучирч, үеэ өнгөрөөсөн барилгуудыг шинэчилж, дэлхийн хотуудтай эн зэрэгцэх хийц, загвартай барилгуудаар хот тэлэхийг үгүйсгэхгүй.
      Гэр хорооллынхон орон сууцанд, тохь тухтай, цэвэр, сэтгэл хангалуун амьдрахын тулд Нийслэлийн их бүтээн байгуулалтыг дэмжиж газраа хурдан чөлөөлөх хэрэгтэй байна. Иргэд хэр хурдан газраа чөлөөлнө, орон сууц тэр эрчээр сүндэрлэх болно. Харин “Алтан загас”-ны эмгэн шиг давраад суух юм бол “эвдэрхий тэвштэй”-гээ хоцорч ч мэдэх юм.
 

 

Холбоотой мэдээ