Нийслэлийн хамгийн их хүн амтай Сонгинохайрхан дүүргийн гэрэлтүүлгийг "Рhilips" гэрэлтүүлэг чимэглэлийн компани хариуцахаар болсон. Харин хэзээнээс ажлаа эхэлсэн, хүндрэл бэрхшээл юу байгаа талаар тус компанийн ерөнхий инженер Б.Батсайхантай ярилцлаа.

-Сонгинохайрхан бусад дүүргийг бодвол  гэр хороолол ихтэй. Дээр нь, гэрэлтүүлэг муу гэж шүүмжилдэг?

-Тиймээ.  Өмнө нь тус дүүргийг "Цахилгаан тээвэр" компани хариуцаж байсан юм билээ. Ингээд нийслэлийн Засаг  дарга Г.Мөнхбаяр захирамж гарган дүүргүүдийн гэрэлтүүлгийг гэрэлтүүлэг чимэглэлийн компаниудад хариуцуулж өгснөөр манай компани Сонгинохайрханыг хүлээж авсан. Өнгөрсөн дөрөвдүгээр сараас ажлаа эхлээд байна. Манай компанийг хүлээж авахад гэрэлтүүлэг 49.8 хувьтай байсан. Одоо 82 хувьтай болсон.

-Нийт хэдэн гэрэлтүүлэгтэй юм. Шинээр хаана нэмж тавьж байгаа вэ?

-Нийтдээ 3600 гаруй гэрэлтүүлэгтэй. Үүний 1600 гаруй нь гэр хорооллынх. Эхний ээлжид манайх орон сууцны хороолол дундах болон авто зам дагуух гэрэлтүүлгийг засварлаад дуусаж байна. Мөн Орбит, Толгойт орчмын гэрэлтүүлгийг засаад дууссан. Шинээр бол гэрэлтүүлэг тавихгүй шүү дээ. Гол нь засаж янзлах ажилладаггүй гэрэлтүүлгийг ажиллуулах. Энэ ч утгаараа өнөөдөр Баянхошуу, Зүүн салааны гэрэлтүүлгийг засварлахад түлхүү анхаарч ажиллаж байна.

-Иргэдийн хувьд гол нь гэр хорооллыг бүрэн гэрэлтүүлэгтэй болгохыг хүсэж байгаа шүү дээ?

-Ерөнхийдөө гэрэлтүүлэг нь ажиллахаасаа ажиллахгүй нь их. Засвар үйлчилгээ нь орхигдчихсон байсан. Манайх ямар ч гэсэн гэрлийн шон л байвал засаж засварлан гэрэлтүүлэгтэй болгож байна. Үнэхээр гэр хорооллын гудамж харанхуй байх нь иргэд орой үдшийн цагаар гэмт этгээдэд өртөх эрсдэлд оруулдаг. Тиймээс гэр хороололд түлхүү анхаарч гэрэлтүүлгийг засаж, засварлаж байгаа хэрэг. Гэхдээ зарим газарт зам дагуух гэрэлтүүлэг асах боломжгүй болчихсон.

-Яагаад?

-Зам дагуу гэрэл, сүлжээний кабель шугам байдаг. Гэтэл гэрэлтүүлгийн тэжээлийн шугамыг энд тэнд гэмтээснээс зарим газар харанхуй болчхоод байна. Тухайлбал, Мах импекс, ТЭЦ-3, Баянхошууны Хөтөл орчим гэсэн гурван газрын гэрэлтүүлэг асах боломжгүй болчихсон. Ямар ч гэсэн ирэх сарын 15 гэхэд засна гэж ажиллаж байна.

-Энэ намар, Засаг дарга өөрийн биеэр дүүргүүдийн гэрэлтүүлгийг шалгана гэж байгаа шүү дээ. Тэгэхээр есдүгээр сар гэхэд бүрэн гэрэлтүүлэгтэй болох уу Сонгинохайрхан дүүрэг?

- Ирэх сард 95 хувь гэрэлтүүлэгтэй болгох зорилт тавьсан. Засаг дарга өөрийн биеэр шалгана гэж гэрэлтүүлэг чимэглэлийн компаниудын удирдлагыг хүлээж авахдаа хэлсэн болохоор 100
хувь гэрэлтүүлэгтэй болгохоор ажиллаж байна. Санхүүжилтийн хувьд асуудалгүй. Гүйцэтгэлийнхээ дараа дор дор  нь авч байгаа учраас хөрөнгө мөнгөнөөс шалтгаалсан зүйлгүй. Ганц хүндрэлтэй зүйл нь кабелийн шугам л байна. Энд тэндээ тасарснаас гэрэлтүүлгийн орчин нэлээд газар харанхуй болчихсон. Тиймээс засаж л байна. Өмнө нь хариуцаж байсан компанитай л холбоотой л доо.

-Танайх хэдэн ажилчинтай вэ. Бас ч гэж газар нутгийн хувьд том дүүргийн нэг шүү дээ?

-12 ажилчинтай. Хэдийгээр Орбит, Баянхошуу, 21 дүгээр хороолол гээд хол хол газар  очиж  гэрэлтүүлгээ засварлаж байгаа ч хариуцсан ажилдаа эзэн болж засвар үйлчилгээгээ цаг тухайд

нь хийгээд явж байна. Өглөө бүр чиглэлээ аваад тал тал тийшээ явдаг. Ирэх намар л

ажлын маань үр дүн гарах байх даа.