Дорнод аймгийн Матад сумын нутаг Тамсагийн сав газарт газрын тосны олборлолт явуулж байгаа “Петро Чайна Дачин Тамсаг Монгол” компанийн тээвэрлэлтийн үйл ажиллагааг энэ сарын 21-нд зогсоожээ. Тус компани Монгол-БНХАУ-ын хооронд тээвэр хийхдээ Монгол Улсын олон хууль дүрэм, журам, хоёр улсын Засгийн газрын хэлэлцээр зэргийг зөрчсөн нь шалгалтаар тогтоогдсон байна. ЗТБХБ-ын сайд Х.Баттулга Монгол Улсад үйл ажиллагаа явуулж л байгаа бол гадаадын аж ахуйн нэгж ч гэсэн Монголын хууль, дүрэмд захирагдах ёстой хэмээн үзэж энэхүү шийдвэрийг гаргасан байна. Газрын тухай, Байгаль орчныг хамгаалах тухай, Авто тээврийн тухай, Авто замын тухай гэх мэт олон хууль зөрчин бичиг баримтын зөрчилтэй хятад жолооч, бүрэн бус машин техникээр, батлагдсан зам маршрутыг зөрчин хоёр улсын хооронд газрын тос зөөж байгаа тус компанийг энэ бүх зөрчлөө арилгатал үйл ажиллагааг нь тодорхой хугацаагүйгээр зогсоожээ.