Улсын хэмжээнд нийт эрүүл мэндийн салбарт шинээр эмнэлэг барих болон засварлахаар 105 төсөл боловсруулаад, хэрэгжүүлж буй. Өвчтэй нялхас эмнэлгийн хонгилд чихэлдэж, өтгөс аравхан хоног эмнэлэгт хэвтэх гэж сар улирлаар өнжин дараалал хүлээж байгаа ийм үед сайхан мэдээлэл байгаа биз. Гэвч хүлээж цөхөрсөн хүний зангаар хэзээ хэдэн эмнэлэг ашиглалтад орох юм бол доо гэсэн эргэлзээ мэдээж төрнө. Тэгвэл ажлын явц ямар байгаатай, өөрөөр хэлбэл нийслэлд баригдаж буй эмнэлгүүдийн барилгын ажилтай Эрүүл мэндийн сайд С.Ламбаа өнгөрсөн бямба гаригт танилцлаа.

Дээр дурдсан төслүүдийн нэг нь Сэтгэц мэдрэлийн эрүүл мэндийн үндэсний төв  /СЭМҮТ/-ийн өргөтгөл. Энэхүү өргөтгөлийн ажилтай танилцах гэж бүтэн цагийн турш замын түгжрэлд зогссоны эцэст 12.00 цагт эмнэлэг дээр очив. СЭМҮТ-д 118 тэрбум төгрөгөөр 250 ортой эмнэлгийг нь ирэх оны арванхоёрдугаар сард ашиглалтад оруулах юм байна. Барилгын ажил графикийн дагуу явагдаж байгаа гэж “Шинэ барилга” ХХК-ний ахлах инженер М.Сэрээнэн хэлж байсан. Манай улсад сэтгэц мэдрэлийн өвчин олон улсын хэмжээнээс 6-8 дахин бага гэж байсан ч сүүлийн жилүүдэд компьютерт донтох болон тодорхойлох боломжгүй өвчлөлүүд нэмэгдэж байгаа гэв.  “Шархадны эмнэлэг зөвхөн галзуу хүмүүс хэвтдэг гэсэн ташаа ойлголтыг өөрчлөх хэрэгтэй. Эмнэлгийн өргөтгөлийг орчин үеийн стандартад нийцсэн,  гадаад орчин нь тохилог байхаар зураг төслийг нь гаргаж шинээр барьж байгаа. Барилгын ажил сайн явж байна” гэж Эрүүл мэндийн сайд хэллээ. Шархадны замыг хааснаас замын ачаалал ихтэй байгаа. Тиймээс барилгын материалыг шөнийн цагаар зөөж байгаа гэж гүйцэтгэгч компанийнхан хэлж байсан.

Үүний дараа Хавдар судлалын эмнэлгийн өргөтгөлийг гүйцэтгэгч “Суурь” ХХК-нийн барилгын ажилтай танилцсан юм.  Эрүүл мэндийн сайдыг бухимдуулаад авсан энэ барилгын шавыг өнгөрсөн онд тавьсан ч барилгын явц урагш ахиагүй л байгаа аж. 3,2 тэрбум төгрөгийн хөрөнгөөр босгох энэ эмнэлэгт  элэгний мэс заслын болон туяа, химийн эмчилгээний танхимуудыг шинээр бий болгож байгаа гэнэ. Биднийг очиход “Суурь” барилгын компанийн захирал гадаад явсан, хариуцсан инженер нь өөр ажилтай гээд явсан гэж ажилчид нь хэлж байсан. Эрүүл мэндийн сайд “Барилгын ажлыг хийнэ, цагтаа дуусгана гэж тендерт шалгарчихаад энэ компанийн байж байгаа байдал энэ. Ирэх оны арванхоёрдугаар сард ашиглалтад оруулах барилга ийм байж байдаг.  Өмнө нь ирж ажлын явцтай танилцаж байхад ийм л байсан. Одоо хэвээрээ л байна” гэж гаслах. Тэгээд нэгэнт дарга нар нь эзгүй учир энэ компанид арга хэмжээ авч ирэх долоо хоногт дарга нарыг нь уулзуулах үүрэг өгөөд явлаа. “Суурь” ХХК нь өмнө нь Баянзүрх дүүргийн өрхийн эмнэлэг барих гэж өчнөөн асуудал үүсгэж, олон дахин засвар хийж байсан аж. Гэтэл ийм асуудал үүсгэдэг компанид дахин энэ том барилгыг барих зөвшөөрөл өгдөг нь юунийх вэ. Эрүүл мэндийн яамны тендерийн хорооныхон анзаарсангүй сонгочихов уу, мэдсээр байж өгөв үү гэдэг нь сонин.

Хавдар судлалын эмнэлгийн өргөтгөлийн барилгын ажлыг харж бухимдсан сайд Яармагийн дэнжид барьж буй шинэ Эх нялхсын төвийн ажилтай танилцлаа. Эх нялхсын эмнэлгийн барилгыг “Нийслэл өргөө”, “Пума” комстракшн хамтран хийж байгаа бөгөөд барилгын ажил  графикийн дагуу явж байгаа гэлээ. Энэ эмнэлгийн А,Б корпусыг “Нийслэл өргөө”, В,Г корпусыг “Пума” комстракшн хийж гүйцэтгэж байгаа бөгөөд барилгын суурийг цутгажээ. Гүйцэтгэгчдийн зүгээс ус, цахилгааны асуудалтай байгаагаа хэллээ. Зөөврийн ус хэрэглэдэг, цахилгаангүйгээс том кранууд нь ажиллахгүй барилгын ажил нь гацахаар байгаа гэж тэднийг учирлахад сайд “ Энэ бидний ажил биш. Бид өгөх ёстой хөрөнгө оруулалтаа хангалттай өгсөн. Та нар өөрсдөө зураг төсөл, загвараа гарган өгсөн мөнгөнөөс төсвийн мөнгийг нь гарган мэргэжлийн хүмүүсээр хийлгэ. Өөрсдөөсөө шалтгаалах ажлыг  шалтаг болгоод сууж байж болохгүй.  Хүйтрэхээс өмнө ажлаа яаравчлан худаг гаргаж, цахилгаанаа хурдан тавиул” гэсэн үүрэг өглөө. Цахилгаан татахад 77 сая төгрөгний төсөв хэрэгтэй байгаа аж.

Эрүүл мэндийн яам дүүрэг бүрт Спортын цогцолбор барьж байгаа.  Сонгинохайрхан дүүргийн 106-р сургуу­лийн дэргэдэх 700 хүний суудалтай спор­тын ордны ажлыг шалгалаа. Энэ цогцолборыг “Боорчи” компани хийж байгаа бөгөөд ирэх онд ашиглалтад оруулах гэнэ. Цогцолборыг барихын тулд мөн л цэвэр бохир усны шугам татах хэрэгтэй байгаа гэнэ.  Төв замаас шугам татахад 733 тэрбум орчим төгрөг шаардлагатай байгаа аж.

Өдрийн ихэнх цагийг замын түгжрэлд өнгө­рөөсөн сайд хамгийн сүүлд Шастины нэрэмжит III эмнэлгийн өргөтгөлтэй танилцлаа. Тус эмнэлгийн өргөтгөлийг хийснээр дөрвөн том мэс ажилбар хийх тасаг, эрчимт эмчилгээ үүний дотор тархины харвалтын мэс засал хийх танхимтай болох аж. Барилгыг энэ оны арваннэгдүгээр сард ашиглалтад оруулна, барилгын ажил графикийн дагуу явж байгаа гэж “Заг” ХХК-ийн инженерүүд хэлж байсан. Шинээр барьж буй өргөтгөлийн өмнө Шастины хөшөөг байрлуулах юм байна.

Дээр дурдсанаар эрүүл мэндийн салбарт энэ жил нийт 105 төсөл хэрэгжүүлж буйгаас нийслэлд 11, орон нутагт 31 том эмнэлэг барих аж. Нийт 38 тэрбум төгрөгний төсөвтэй. Үүнээс 21,1 тэрбумыг шинээр болон он дамжин барьж буй барилгад, найман тэрбумыг нь урсгал засварт, найман тэрбум нь тоног төхөөрөмжид зарцуулах юм байна. Шинээр барьж буй томоохон эмнэлгүүд бүгд шинэ тоног төхөөрөмжөөр хангагдах ёстой гэж Эрүүл мэндийн яамны барилга захиалагчийн албаны дарга Н.Бат-Эрдэнэ хэлж байлаа. Ийнхүү Эрүүл мэндийн сайд ажлынхаа явцтай танилцахад бухимдуулах зүйл мундахгүй гарч байв. Төсөлд “зурагдсан” сайхан эмнэлгүүдээ хугацаанд нь ашиглалтад оруулаасай даа.

 Эх сурвалж : http://www.news.mn/content/73214.shtml