Барилгачдаа байртай болгоё.

Барилгачдаа байртай болгоё.

Барилгын салбарт ажиллагсдын нийгмийн асуудал орхигджээ.  “Загасчины морь усгүй” гэдгийн адил ихэнх барилгачид байргүй, амжиргааны доогуур түвшинд амьдарч байна.  Халуунд халж, хүйтэнд хөрч, хүнд бэрхийг хийж, хүнд барьж өгөөд байдаг өөрсдөө байртай болдоггүй.

Нэгэн жишээг дурдья. Одоо барилгачдын маань амьдрал ямар хүнд байна, яаагаад цалингаа буухаар архиа уугаад ажлаа таслаад байна. Хүүхдээ цэцэрлэгт өгч чадахгүй авгай нь гэртээ хүүхдээ хараад, ажлаа тараад орой очихоор авгай нь мөнгө нэхээд л, чам шиг арчаагүй амьтан хаана байна, өөрөө байшин барьдаг байж, гэр хороололд хэцүү тарчиг амьдруулаад гээд л үглэнэ. Авгайдаа, амьдралдаа сэтгэл хангалуун бус барилгачин тэсэхээ байхаар  стрессээ тайлах гэж архи ууна, хажуудахаа уруу татна тэгээд архинд донтогчид болж байна. Монгол барилгачид архи уудаг, ажил тасалдаг, хулгай хийдэг, бүтээмж муу, ур чадваргүй зэргээр гоочилдог хүн олон бий.

Хэрэв барилгачид маань тохилог орон сууцанд амьдарвал, үр хүүхэд нь тохилог цэцэрлэг сургуульд сурч, авгай нь ажилтай, өрхийн орлого нь амьдралд нь хүрэлцээтэй байвал ар гэр нь аз жаргалтай ажлаа хийхэд хичнээн урамтай, бүтээмжтэй байх билээ.

Барилгын салбарын ажилчдын нийгмийн чухал асуудал болсон орон сууцны асуудлыг шийдсэнээр ажилчид тогтвор суурьшилтай ажиллах нөхцөл бүрдэж, барилгын салбарт ажиллах залуусын тоо нэмэгдэх болно.

Төрийн албан хаагчид, төсвийнхөн гээд байртай болгох төсөл хөтөлбөр, хөнгөлттэй зээлд хамруулах зэрэг олон арга хэмжээ явагддаг. 40000, 4000 орон сууцны хөтөлбөр хэрэгжүүллээ. Одоо 100000 айлын орон сууцны төсөл хөтөлбөр хэрэгжүүлнэ, та нар бариад бай, бид байртай болмоор байна гэж өөрсдийгөө бодохоос барьж бүтээдэг барилгачдаа байртай болгох талаар ямар ч ажил хийхгүй, хэн ч санаа зовнихгүй байна.

Бурхан хүнийг бүтээсэн, бусдыг барилгачид бүтээсэн гэж биднийг онгироож, хамаг барилгаа бариулчихаад юу ч үгүй хоосон байлгаж байна. 4 мөчөө салтал нь савлуулж байгаа барилгачдад байртай болно гэдэг мөрөөдөл болжээ.

Иймд бид барилгачидаа байртай болгох боломжийг бий болгоё.

Хэн нэгэн эрх мэдэлтэн, бидэнд май гээд байр өгөхгүй нь мэдээж. Байртай болох хичнээн барилгачин айл өрх орон сууцанд амьдрах хүсэлтэй байгаа талаар судалгааг гарган, тодорхой төсөл хөтөлбөрийг МУ-ын ЗГазарт санал оруулж, шийдвэрлүүлэх шаардлагатай байна. Бусад салбарынхан ажилчдаа байртай болгох, хөнгөлттэй зээлд хамруулах тал дээр ажиллаж, хүсэлтээ холбогдох газруудад нь гаргаад эхэлсэн байна. 100,000 орон сууцны төсөлд болон барилгачдаа орон сууцжуулах хөтөлбөрт олон барилгачдаа хамруулахыг зорин ажиллах хэрэгтэй байна.

10,000 барилгачдыг орон сууцжуулах хөтөлбөрийг батлан гаргаж, барилгачдаа орон сууцжуулах боломж бидэнд бүрэн байна. Барилгачид жилийн 6 хувийн хүүтэй зээлээр  орон сууцанд орох боломжоор хангагдах  бүрэн боломжтой.

Энэхүү үйл ажиллагаанд мэргэжилтэй ажилчид, инженер техникийн ажилчид, зураг, төсвийнхөнийг хэрхэн хамруулах талаар ажиллахад болон барилгачдаа байртай болгох хөтөлбөрийг хэрэгжүүлэхэд та бүхний үнэтэй санал, дэмжлэг хамгийн чухал бөгөөд хамтран ажиллах байгууллага, хувь хүмүүсийг урьж байна.

 

Барилгын Зөвлөгөө Мэдээллийн Төв

Е-мейл: batsukh@barilga.mn

Холбоотой мэдээ