Баруун Тасганд юу болж байна?

Саяхан Нийслэлийн удирдлагуудын сүр дуулиантайгаар шинэ орон сууцны барилгынхаа шавыг тавьсан БГД-ийн 11-р хорооны Баруун тасганы оршин суугчид хувийн өмчийн газарт халдаж байгаа тухай мэдэгдсэн хэвлэлийн хуралд тус хорооны иргэн Б.Баярбат, Ц,Очирбат, Л.Батбаяр, Д.Нямдулам, Н.Түмэн-Өлзий зэрэг иргэд оролцож доорх мэдээллийг хийсэн юм.

Иргэн Л.Батбаяр:
-Биднээс зөвшөөрөл авалгүй бидний газрыг булааж барилга барина гэдэг чинь үндсэн хууль зөрчиж байгаа хэрэг шүү дээ. Бид хотоо утаагүй, цэвэр цэмцгэр байлгахын эсрэг байдаг хүмүүс биш. Тиймээс энд орчин үеийн технологоор бага өртөгтэй ямар ч орон сууц барьж болно. Бидэнд үүнийг барихад хамгийн түрүүн хөрөнгө л дутагдаж байна. Жишээ нь: Хотын төвийн А зэрэглэлийн 2.6 га газар дээр цэцэрлэг, сургуулиас эхлээд юм юмтай 10 давхар барилга 25 тэрбумаар бариад одоогийн зах зээлийн үнээр зарахад 75 тэрбум төгрөг болно. Та бүхэн тэр 25 тэрбумыг хасаад үз. Энд 50 тэрбум төгрөгийн асуудал яригдаж байгаа юм. Гэтэл бид энэ үнэ цэнэтэй өмчөө хоёр өрөө байраар л солино гэдэг бол шударга бус. Нийслэлийн удирдлагууд хамгийн гол нь яагаад бидэнтэй тохиролцоогүй юм. Энэ асуудлыг тэнд оршин суудаг 56 айлаас 3 айлтай л ярьсан байналээ. 2008 оны нэгдүгээр сарын 22-ны өдрийн Нийслэлийн Засаг даргын 30 тоот захирамжинд заахдаа Газрын тухай хуулийн дагуу орон сууцны зориулалтаар газар эзэмших, ашиглах эрх авсан болон өөрийн өмчлөл ашиглалтанд байгаа газрын зориулалтыг орон сууцны барилгын зориулалтаар өөрчилөхөөр бол газар эзэмшигч ашиглагч, өмчлөгч нартай хамтран ажиллах гэрээ байгуулахыг заасан байдаг.

Гэтэл энэ заалтыг зөрчиж, бидэнд 24 цагийн өмнө урилга тараагаад л барилгын шав тавьж байгаа нь иргэдийн эрх ашгийг хөсөрдүүлж байгаагийн илрэл боллоо гэж үзэж байна. Бидний газар учраас бид барилгаа баримаар байна. Бидэнтэй хамтран ашигтай ажиллах компаниуд зөндөө л байна шүү дээ. Бидний энэ тэмцлийг энд оршин суудаг 56 айлаас 115 хүн дэмжиж гарын үсэг зурсан. Өрхөөр бол бараг 90 хувь дэмжиж байна. Бидэнд хоёр өрөө байр байтугай боломж байна. Бид өөрсдийн газар дээр эзэн болоё.

Иргэн Ц.Очирбат:
-БГД-ийн 11-р хорооны Баруун тасганы 1,2-р гудамжинд амьдардаг оршин суугчид бид өмчилсөн газраа улс төр бизнесийн шунахай бүлэглэлд алдахгүйн тулд түр хороо байгуулж өөрсдийнхөө эрх ашгийг хамгаалах болсоноо та бүхнээр дамжуулан мэдэгдэж байна. Өнгөрсөн даваа гариг буюу тавдугаар сарын 12-ны өдөр бидний олон жилийн турш амьдарч өмчилсөн газар дээр барилгын шав тавихаар Нийслэлийн удирдлагууд болон гүйцэтгэгч талын зарим хүмүүс иргэд бидэнтэй зөвшилцөлгүйгээр дур мэдэн түрэмгийлэн ирж өөрсдийн хүсэлээ гүйцэлдүүлсэнд эсэргүүцлээ илэрхийлж үнэн учрыг мэдээлэхээр энэ хурлыг хийж байна. Бид одоогийн амьдарч байгаа 2.6 га газрыг Үндсэн хууль, иргэний болон өмч хувьчлалын хуулийн дагуу эндхийн оршин суугчид бид өрх гэрээрээ өмчилж хэдэн үеэрээ амьдарч ирсэн нийслэлийн А зэрэглэлийн бүсэд хамрагдсанаараа олон давуу талуудтай байдаг учраас оршин суугчдын ихэнх нь ажил амьдралынхаа ирээдүйг энэ газартай холбон төлөвлөсөн байдаг юм. Бид хувийн өмчөө захиран зарцуулах давамгай эрхээ эдлэх байтал бидний ямар нэг оролцоогүйгээр асуудлыг хүч түрэмгийлэн өөрсдийн эрх ашгийн үүднээс шийдсэнийг эсэргүүцэж эрх ашгаа хамгаалах шаардлагатай боллоо.

Иргэн Д.Нямдулам:
-2006 оны 12.06-ны НИТХТ-ийн 267-р тогтоолоор тус газарт амины орон сууцны хороолол болгох, хэсэгчилсэн ерөнхий төлөвлөгөө хийхээр тогтсоныг нийтийн орон сууцны хороололын барилга барихаар дур мэдэн өөрчилж энэ хэсгээс ихээхэн ашиг олохоор төлөвлөсөн нь төр бизнесийн шунахай бүлэглэлийнхний амин хувиа хичээсэн явцуу дүр төрх болох нь илэрхий байна. Ерөнхий архитектор Нацагдорж албан тушаалаа урвуулан ашиглаж олон айл өрхийн өмчлөлийн газар луу улайран дайрч, энэхүү хэсэг дээрхи хотын хэсэгчилсэн ерөнхий төлөвлөгөөг бизнесийн олигархи бүлэглэлийнхэнтэй хамтран өөрчилсөн гэж үзэж Нацагдоржийг огцрохыг шаардаж байна. Бид хувьчилсан газартаа инженерийн дэд бүтцийг тавиулж орчин үеийн цэвэр үзэмжтэй амины орон сууцнуудыг үйлчилгээний төвүүдийн хамт барьж амьдрахыг зорьж байна. Яагаад заавал эрх мэдэлтнүүд бидний оролцоогүйгээр шийдвэр гаргаж өөрсдийнхөө бусармаг үйл ажиллагааг ард түмэн бидэнд тулган хүлээлгэх гээд байгаа юм бэ? Бидний газрыг ямар үнээр авах, яаж бидний амьдралын тайван нөхцлийг эвдэхгүйгээр баталгаатай байлгах, баригдах барилгаас хэдэн хувийн ашгийг яаж өгөх талаар ямар ч гэрээ акт бичиг, баримт хэлцэл байхгүйгээр нийслэлийн удирдлагад байгаа Хувьсгалт Намын эрх мэдэлтнүүд зохион байгуулж, өмчилж авсан газрыг булааж авах ажиллагаа явуулж байна. Бид өөрсдийн өмчилсөн газар дээр аль ч төрлийн бүтээн байгуулалтын ажилд хэн нэгэн этгээдийн шахалт, дайралтаас үл хамааран давамгай эрхтэйгээр оролцох болно. Бид өмчилсөн газраа хэрхэхээ шийдэж, арилжах үнээ ч өөрсдөө хэн нэгний оролцоогүйгээр тогтоох эрхтэй. Бидний энэ газрын арилжих үнэлгээ 1 кв метр  нь байршлаасаа хамаарч 800-1000 ам доллартай тэнцэх болно. Бид хууль хяналт болон хүний эрхийн байгууллагууд, Иргэний болон төрийн буй байгууллагууд, Авилгатай тэмцэх газарт хандаж эрх ашгаа хамгаалуулах талаар асуудлыг тавина.

Тэд ийн мэдээлэл хийлээ. Харин хэвлэлийн хуралд оролцсон сэтгүүлчид тэднээс газрыг нь хэрхэн үнэлж байгаа болон байраар солих нь харин ч ашигтай байх биш үү гэсэн асуултуудыг асууж хотын өнгө үзэмж, хөгжлийг бодож үзсэн эсэх талаар сонирхож байлаа. Тус дүүргийн иргэд мэдээж энэ тухай бодож буй бөгөөд хотын өнгө үзэмжид тохирсон амины орон сууцуудыг өмчлөлийн газар дээрээ барьж байгуулах хүсэлтэй байгаагаа илэрхийлж хувийн өмчид халдаж буй явдлыг эсэргүүцсэн юм.
 

Холбоотой мэдээ