Монгол улсын Засгийн газраас хэрэгжүүлж байгаа “Шинэ бүтээн байгуулалт дунд хугацааны зорилтот хөтөлбөрийг хэрэгжүүлэх арга зам”  сэдвээр уулзалт ярилцлагыг зохион байгууллаа. Уулзалт ярилцлаганд үе үеийн ахмад барилгачид болон Шадар сайд М.Энхболд, ЗТБХБЯ-ны төрийн нарийн бичгийн дарга Ж. Бат-Эрдэнэ, МБХ-ны ерөнхийлөгч М. Батбаатар, МҮХАҮТ- ын Барилгын зөвлөлийн дарга Б. Амарсанаа, БЗМТ-ийн захирал Г. Батсүх болон барилгын компаниудын төлөөлөл оролцлоо.

Уулзалтыг МАН-ын дэргэдэх Ахмадын холбооны тэргүүн, МУ-ын гавъяат барилгачин , эдийн засгийн ухааны доктор Ө. Дорждэрэм нээж, Засгийн газрын гишүүн Шадар сайд   М. Энхболд “Шинэ бүтээн байгуулалт” дунд хугацааны хөтөлбөрийн талаар Засгийн газраас авч хэрэгжүүлж байгаа арга хэмжээ, ЗТБХБЯ –ны Газрын харилцаа, барилга, геодези зураг зүйн газрын дарга Ц. Ганхүү “Шинэ бүтээн байгуулалт” хөтөлбөрийг хэрэгжүүлэх төрийн зохицуулалтын арга механизм сэдвээр ирсэн зочдод мэдээлэл өгсөн юм.

     Уг хөтөлбөрийн ач холбогдол нь ажлын байрыг бий болгох, иргэдийн амьжиргааны түвшинг дээшлүүлэхэд оршиж байгаа бөгөөд нийт 627 тэрбум төгрөгний бүтээн байгуулалтын ажил хийхээр төлөвлөгдсөн байна. Мөн Засгийн газраас “Эх орны хишиг” гэж иргэдэд бэлэн бусаар өгч 1 сая төгрөгийг орон сууцандаа шилжүүлэх хүсэлтэй иргэдийг ОССК-аар дамжуулан бүртгэлийг нь явуулах тухай Шадар сайд мэдээлэлдээ дурьдлаа. Тус хөтөлбөрийн хүрээнд хийгдэж байгаа 75 мянган айлын орон сууцны 15 айлын орон сууцыг дунд болон дундаас доош түвшиний орлоготой иргэдийг орон сууцжуулах төсөл болон хэрэгжих гэнэ.

      Харин Монголын барилгачдын холбооны ерөнхийлөгч М. Батбаатар барилгын салбарын төрийн бус байгууллагууд болон аж ахуйн нэгжээ шинэ бүтээн байгуулалтанд бүрэн хамруулах талаар баримталж буй бодлого, тулгамдсан асуудал нь юу болох талаар санал бодлоо хэллээ. МБХ-оос “Шинэ бүтээн байгуулалт”-тай холбогдуулан гаргаж ирсэн нэг бодлого нь 10-тийн систем юм. Энэ системийг хэрэгжүүлж чадвал монгол барилгачид эх орныхоо бүтээн байгуулалтанд гар бие оролцох боломж нь бүрдэнэ.

    Шинэ бүтээн байгуулалтын талаар ахмад болон гавъяат барилгачид өөрсдийн олон жилийн ажлын туршлага дээр үндэслэн заавар зөвлөгөө, санал бодлоо илэрхийллээ. Мөн барилгын салбарын хөгжил, баримталж буй бодлогыг нь ч зарим нэг хэсэг нь хатуухан шүүмжлээд авна лээ. Ахмад барилгачдын шүүмжилж байсан гол асуудал нь барилгын үнэ бүрдэлт, төсөв норм норматив, баримт бичгийн шинэчлэл, барилгын материалын тухай голчлон ярьж энэ тал дээр анхаарлаа хандуулахыг төрийн байгууллагын удирдлагуудад хүсэлт болгон тавьж байлаа.

     Бүтээн байгуулалтыг хийнэ л гээд байдаг тэдгээрийг барьж босгодог, бүтээдэг барилгачдын нийгмийн байдлыг сайжруулах талаар БЗМТ-ийн захирал Г. Батсүх болон НАМОХ-ны ерөнхийлөгч, МҮХАҮТ-ын барилгын зөвлөгөө мэдээллийн төвийн дарга Б. Амарсанаагийн гаргасан Засгийн газраас оюутнуудад тэтгэлэг маягаар сар бүр өгч байгаа мөнгө нь тэдний тав тухтай, сурч боловсрох орчинг нь бүрдүүлэхэд зарцуулбал хангалттай хэмжээний хөрөнгө болж байна гэсэн саналыг уулзалтанд ирсэн хүмүүс дуу нэгтэй хүлээн зөвшөөрч байсан юм. Мөн бүтээн байгуулалтыг ярихаасаа илүүтэй тэдгээрийг бүтээн босгох мэргэжилтэй ажилчдын тоо дутмаг байгааг ч анхаарах хэрэгтэй гэсэн сануулга ч уулзалтанд оролцогчид хэлж байлаа.

       Уг уулзалт ярилцлагаас гарсан санал хүсэлтийг Шинэ бүтээн байгуулалт хөтөлбөрийн хэрэгжилтэнд тусган анхааран ажиллахаа албаны хүмүүс мэдэгдлээ