Нийслэлийн Барилга, хот байгуулалт, төлөвлөлтийн газраас хэрэгжүүлж буй нийтийн зориулалттай орон сууцыг паспортжуулах ажлын явцтай Засаг даргын орлогч Б.Мөнхбаатар танилцлаа. Тухайлбал инженерийн биет болон физик элэгдлийн судалгааг явуулж буй СХД-ийн таван шарын 1-р байр, бичил чичирхийлэл хэмжигч “Жи Эс Ар-24” багажийг суурилуулан хэмжилт хийж байгаа 16-р хорооны 4 дүгээр байранд тус тус очсон юм. Энэ үеэр манай улсад анх удаа хийгдэж буй үл эвдэх аргаар барилга байгууламжийн чанар насжилтыг тодорхойлон паспортжуулах ажилд тулгарч байгаа хүндрэл бэрхшээл, цаашид ажлаа улам боловсронгуй болгоход юун дээр анхаарах талаар ярилцсан. Тодруулбал иргэдийн аюулгүй орчинд амьдрах нөхцлийг бүрдүүлэх, болзошгүй аюулаас урьдчилан сэргийлэх зорилготой энэхүү ажлын хэрэгжилтийн явцад ханаа нурааж зориулалтыг нь өөрчилсөн айл өрхүүд гэртээ хэмжилт хийлгэхээс татгалзаж байгаа нь бодит дүгнэлт гаргах боломжгүйд хүргэж байгаа талаар учирлалаа. Б.Мөнхбаатар дарга хэлэхдээ Герман улсад хуучин барилга байгууламжийн гадна талыг өнгөлөн засвар хийхийн хажуугаар чанар насжилтыг нь тодорхойлон хүчитгэх зэрэг арга хэмжээг авдаг. Манайд энэ нь шинэ ажил боловч бид цаашид ажлаа улам сайжруулж иргэд олон нийтэд ойлгуулан таниулж хамтран хэрэгжүүлэх хэрэгтэй. Мөн удахгүй дэлхийн Цардасын хүрээлэнгийн эрдэмтэн мэргэжилтнүүд ирж бидний ажилд ихээхэн дэм өгнө хэмээн онцолсон.