Сүхбаатар, Чингэлтэй дүүргүүдэд "сүйтгэн байгуулалт"-ын ажил ид өрнөнө. Зүв зүгээр байсан замын хашлага, явган хүний зам зэргийг тэд шинээр бүтээн байгуулж байна. Цирк орчмын явган хүний зам дагуух бүх замын хашлагыг нэг шөнийн дотор аваад "хаячихаж". Тэнд уг нь оройн цагаар залуус зугаалдаг талбай байсан юм. Гэтэл хашлагыг нь аваад энд, тэнд нь тавьчихсан болохоор замаа сайн харж л явахгүй бол тээгэлж унах гэмтэй. Яг ийм дүр зургийг МУИС-ын өмнөх зам, "Их дэлгүүр" орчмын замаас харж болно. Гэтэл хэргийн эзэн болсон "замын хашлага" иргэдийн амьдралд гай тарьсан нь үгүй. Харин Сүхбаатар, Чингэлтэй дүүргийн удирдлагууд замын хашлагыг гол "дайснаараа" сонгожээ. Гэвч энд тэнд нь ангархай үүсээд машинууд түүнийг тойрч гарах гэж чамгүй гацаа үүсгэдэг авто замыг тэд зүгээр хэмээн үзэж. Ангархай замтайгаар хэдэн жилийн нүүрийг үзэж байхад бараг жил болгон хашлага гээч гайхалыг сольж байх юм. Хашлагыг жил болгон солихын учир нь юу вэ?
Олон нийтийн нэрлэж заншсанаар Улсын их дэлгүүрээс цирк хүрэх замд байдаг "фонтан" орчмын газрыг тэр чигт нь солихоор болжээ. Тэд үүнийгээ 2011 оны бүтээн байгуулалт гэсэн сүржин нэрээр нэрлэжээ. Зүгээр байсан усан оргилууруудыг нурааж орчин үеийн усан оргилууруудыг барих гэнэ. Их дэлгүүрийн урд талын усан оргилуурууд орчин үетэйгээ таарахаа больжээ. Усан оргилуур нь цаг үеэ дагахгүй хоцорч байхад дунд нь ангархай гарсан зам орчин үетэйгээ зэргэцэж байгаа юм байх. Жолооч нар үүнд нь бухимдаж байхад Засаг дарга үүнийг нь энгийн зүйл хэмээн үзэж. Зүгээр байсан талбайд хашаа хатгаж Сүхбаатар дүүрэг гэсэн том багана барина. Бусад бүх дүүрэг өөрийн гэсэн баганатай байхад Сүхбаатар дүүрэгт алга. Учир нь тэд баганагүй болохоор "хөгжлөөс" хоцорч байгаа юм байх. Тэд үүндээ 1-5 тэрбум төгрөгийг ч зарцуулжээ. Жирийн иргэд нь замын хашлагыг нь солиод, замаа янзлаагүйд гайхан "жил болгон сольж яах гэж байгаа юм бол" хэмээн бодож толгойгоо гашилгаж байхад иргэдээсээ холдсон Засаг дарга үүнийгээ "2011 оны бүтээн байгуулалт" гэж нэрлэжээ.
Чингэлтэй дүүрэгт мөн л ийм дүр зураг ажиглагдана. Бидний нэрлэж заншсанаар хүнсний нэгдүгээр дэлгүүрийн авто замын дунд байдаг явган хүний замыг тэд дахин "бүтээн байгуулсан". Өмнөх нь зүв зүгээр байхад тэд сольжээ. Гэвч энэ нь урьдынхаасаа муудсан мэт. Тэд үүгээр ч дууссангүй. Шөнө болохоор гэрлийн шон болгоны хооронд асдаг цэнхэр гэрлээр бүтээн "байгуулалт"-ын ажлаа үргэлжлүүлжээ. Ямар ч хэлбэргүй асах хэлхээтэй хэдэн гэрэл нийлээд 90 сая төгрөг болсон гэх. Гэхдээ энэ тоо албан ёсны тоо биш гэдгийг санах хэрэгтэй. Албан ёсоор батлагдаад ирвэл хичнээн хэмжээний тоо гарч мань мэтийгээ ангайлгах бол.
Энэ мэтчилэн биднээс илүү "ухаантай" хүмүүсийн эхлүүлсэн "бүтээн байгуулалт"-ын ажил зун эхлэхтэй зэрэгцэн өрнөж байна. Хүний бүтээснийг дахин байгуулж хичнээн тэрбум төгрөгийг зарцуулж байгаа гэдэг нь эргэлзээтэй. Асуудал үнэхээр бүтээн байгуулахад байна уу эсвэл...? Болдог бол ийм хуурамч ажил хийдэг дарга нарын толгойг "бүтээн байгуулалт" нэрээр сольчих юмсан. Даанч гаж сэтгэлгээтэй тэдний толгойг авах хүн олдохгүй л дээ.