Нийслэлд хараа булааж, сэтгэл сэргээсэн цэцэрлэгт хүрээлэн нэгээр нэмэгдлээ. Сангийн яам үүсэн байгуулагдсаны 100 жилийн ойн хүрээнд Чингэлтэй дүүргийн дөрөвдүгээр хороонд дурсгалын багана бүхий “Эрдэнэсийн арал” нэртэй цэцэрлэгт хүрээлэн байгуулж, нээлтээ хийлээ.
Тавдугаар дунд сургуулийн хажууханд байгуулсан хүүхдийн тоглоомын талбай, усан оргилуур, модот төгөл бүхий цэцэрлэгт хүрээлэнгийн төвд Монгол Улсын төсөв, санхүүгийн үйл ажиллагаа өнгөрсөн, одоо, ирээдүй гурван цагт, үеийн үед тасралтгүй үргэлжилж байхыг бэлгэдсэн дурсгалын багана байрлуулжээ.
Баганын оройд Монгол Улсын төрийн бодлого, үйл хэргийг дээдлэн байхыг ерөөж Алтан соёмбо залжээ. Багана гурван талтай бөгөөд тал тус бүрт нь Богд эзэн хааны зарлиг, Сангийн яамны 100 жилийн ойн уриа зэргийг сийлсэн байв.
Энэхүү цэцэрлэгт хүрээлэнг Монголын эрдэнэсийг зөв зарцуулах, ариглан хамгаалах байгууллага үүрд мандан бадрахын ерөөлийг бодож ийнхүү нэрлэсэн аж.
Монгол Улсад Санхүү, эдийн засгийн алба үүсэн хөгжсөний буюу Сангийн яам байгуулагдсаны 100 жилийн ойд зориулан босгосон энэхүү багана бүхий цэцэрлэгт хүрээлэнгийн нээлтэд УИХ-ын гишүүн Д.Хаянхярваа, Сангийн дэд сайд Ч.Ганхуяг, Төрийн нарийн бичгийн дарга Д.Баттөр, Чингэлтэй дүүргийн Засаг даргын орлогч Ариунбуян тэргүүтэй зочид төлөөлөгчид оролцлоо.