Их аврага барилгын салбарт хүч сорих бололтой

Их аврага барилгын салбарт хүч сорих бололтой

 

     Монгол улсынхаа нэрийг эрэмгий хурц, дайчин барилдаан, омголон хурц зангаараа Японы сумогийн дэвжээнд мөнхөлж чадсан хүн бол Асашёорюү Д. Давгадорж. Түүний тухай ямар ч мэдээ үргэлж сонирхол татдаг. Зодог тайлах шийдвэрээ ч олныг алмайртал, харамсмаар гэнэтийн дуулгасан их аварга одоо ч олны анхаарлын төвд хэвээр байсаар. Түүнийг өнөөдөр улс төрийн намууд сонирхож байна, гадна, дотны бизнесмэнүүд түншлэхийг хүсч байна. Олон нийтэд ч Асашёорюү цаашид юу хийх бол, хувийн карьертаа ямар тэсрэлт хийх бол гэсэн хүлээлт байгаа нь нууц биш. Ийм хүлээлт, сонирхол татсан хариултуудад тэр заримдаа шууд хариулт өгдөг. “Яагаад би эх орондоо ураны орд эзэмшиж болдоггүй юм...” гэх мэт.
     Тэгвэл Монгол Улсад ганцхан байдаг Үндэсний циркийг хувьчлан авч, Үндэсний хөрөнгө оруулалтын банк байгуулан, ах нартайгаа хамтран чадамгай удирдаж яваа Асашёорюү дэлхийн нүд, чих болсон “CNN” телевизээр мөрөөдлөө хуваалцаж, Улаанбаатарын хотын төвд цэцэглүүлэх шинэ бизнесээ танилцуулжээ.  
    Асашёорюү CNN-д өгсөн ярилцлагадаа “Би бизнесийн салбарт эргэлт буцалтгүй орсон.  Амжилт гаргахын төлөө зорьдог миний хүсэл тэмүүлэл сумод байсан шигээ эрч хүчтэй хэвээрээ байгаа. Мэдээж хэрэг, дэлхийд зартай тэрбумтан болно гэдэг хэцүү.  Гэхдээ л  би маш сайн бизнесмэн болохыг хүсч байна” гэсэн байв.  
   Улсын циркийг нурааж, оронд нь олон давхар барилга барихаар зураг төслийг нь бэлэн болгосон тухай яриа саяхнаас олны ам дамжих болсон. Энэ талаар Асашёорюү CNN-д тун ойлгомжтой тайлбар өгчээ. Гэхдээ циркийг зориулалтаар нь ашиглах, үгүйг мэдэхгүй.  Түүний танилцуулсан барилгын зураг төсөл дээр дугуй, том байшин хэвээрээ байгааг одоогийн цирк гэж харж болохоор. Харин циркийн барилгын дээврийн зураг төслийн хувьд эрс өөрчлөгдөх бололтой.
Удахгүй барилгын салбар нэгэн хүчтэй бизнесмэнээр бүл нэмэх бололтой.

 

 

Холбоотой мэдээ