2008 оны долдугаар сарын 1-ний өдөр болсон эмх замбараагүй үйл явдлын эмгэнэлт нэг гэрч болж үлдсэн байгууламж бол МАН-ын төв байр юм. Одоо түүнийг нураах ажил ид байна.
Н.Төмөрхүү захиралтай “Өндөр буянт холдинг” ХХК 11 давхар шинэ байрны гүйцэтгэгчээр шалгараад ажилдаа оржээ. Одоо тэнд нураагч долоон механизм, 30 гаруй хүн 24 цагийн турш, хөдөлмөр хамгааллын өндөр хяналтын дор ажиллаж байгаа аж. Гарсан хогийг 22,00-07,00 цагийн хооронд 20 тоннын даац бүхий 24 машинаар хуучнаар Улаанчулуутын хогийн цэг рүү зөөж байгаа гэнэ.
МАН-ын нураасан байрнаас үнэгүй тоосго болон барилгын бусад эд зүйл авч болох юм байна гэж зарим хэвлэл мэдээлсэн. Үүнийг, “Нураах ажиллагаа өндөр хяналтын дор, хүнд механизмаар буулгаж байгаа учраас ашиглах бололцоотой зүйл нэгээхэн ч гарахгүй” хэмээн барилгын захиалагч болон гүйцэтгэгч тал няцаав. Эндээс 620 орчим тонн төмрийн хаягдал гарах нь. Түүнийг Дарханы төмөрлөгийн үйлдвэрт нэг тонныг нь 160 мянга орчим төгрөгөөр худалдана гэж үзвэл 100-гаад сая төгрөгийн эх үүсвэр олох тооцоо бий аж.
Монголын түүхэнд өмнө нь ийм том хэмжээний барилгыг нурааж байгаагүй гэсэн. Энэ сарын 20 гэхэд буулгах ажиллагааг дуусгаж, угсралтын ажлыг эхлүүлэх аж. Тэр үед 150 орчим хүн гурван ээлжээр 24 цагийн турш ажиллах юм байна. Барилгын үндсэн материалаа 100 хувь дотоодоосоо авна хэмээн Н.Төмөрхүү захирал ярьж байна лээ.
Шинэ байр ил үзэгдэх орчиндоо есөн давхар байх бөгөөд газар доор хоёр давхар баригдахаар төлөвлөжээ. Спортын заал, хурлын их, бага танхим, МАХН-ын түүхийг харуулсан музей, тэр дотроо “долдугаар сарын 1”-нд болж өнгөрсөн балмад явдлыг тусгайлан сануулсан үзмэр шинэ барилгад байгуулах аж.
МАН-ыг үүсгэн байгуулсаны 90 жилийн ой 2011 оны гуравдугаар сарын 1-нд тохионо. Намынхан нь түүнээс өмнө байраа ашиглалтад хүлээж авахыг хүсч байгаа. Харин гүйцэтгэгч “Өндөр буянт холдинг” ХХК-ийн захирал Н.Төмөрхүүгийн хэлж буйгаар 2010 оны арванхоёрдугаар сарын 30 гэхэд барилгын ажлыг бүрэн дуусгана хэмээн МАХН-ын ерөнхий нарийн бичгийн дарга У.Хүрэлсүхэд амлав. Өнгөрсөн баасан гаригт У.Хүрэлсүх хуучин байрыг нь нурааж буй ажлын явцтай танилцсан юм. 2008 оны долдугаар сарын 1-ний эмх замбараагүй явдлыг зохион байгуулж, өдөөн турхирснаараа МАХН-ыг улс төрийн тавцангаас арчихыг хүссэн бол санасны гарз хэмээн У.Хүрэлсүх хэлээд авсан.
Дашрамд дурдахад генсекийн дараагийн нэг том ажил нь намдаа эхлүүлсэн шинэчлэлийг тууштай үргэлжлүүлэх, 2012 оны сонгуульд намаа ялуулах. Тэрбээр улс төрийн агуулгатай асуултад хариулахаас татгалзаж байна лээ. Нөхөн сонгуульд нэр дэвшихгүй гэдгээ харин хэлсэн. Түүнээс зарим зүйл тодрууллаа.
-Байр барих хөрөнгийн асуудлыг хэрхэн шийдвэрлэж байгаа вэ?
-Нийтдээ 14 тэрбум төгрөгийн өртгөөр баригдана. Нөхөн олговрын тухай хуулиар долоо орчим тэрбум төгрөгийн хохирол барагдуулахаар байгаа. Гэхдээ эцсийн хэмжээг шүүх тогтооно. МАХН-ын гишүүд, дэмжигч, Социнтернээс тодорхой хэмжээний хандивын туслалцаа үзүүлнэ гэж найдаж байгаа.
Намынхаа байрыг нураалгаж байгаа сэтгэл эмзэглүүлсэн энэ үйл явдлыг хараад миний санаанд нэг дүр зураг бууж байна. 2008 оны долдугаар сарын 1-ний үймээн самууны үеэр МАХН-ын байранд 300 гаруй хүн байсан. Гэтэл үймээн дэгдээгчид тэднийг бүсэлж аваад гадагш гаргахгүйгээр чулуу нүүлгэж, шатааж эхэлсэн байдаг. Хэрвээ цагдаа, хүчний байгууллага шуурхай арга хэмжээ авч, зөв ажиллаагүй бол тэр тооны хүн амь нас, эрүүл мэндээрээ хохирох нөхцөл байдал үүсээд байсныг хүмүүс тэр бүр ярьдаггүй юм. Гэхдээ эрдэнэт хүний амь наснаас илүү ямар ч хохирол байдаггүйг санах хэрэгтэй. Тийм эмгэнэлт хэрэг явдлыг хэн, хэрхэн зохион байгуулсныг хүмүүс мартах эрхгүй.