Монгол Улсын Засгийн Газрын 2008-2012 оны үйл ажиллагааны хөтөлбөрт тусгагдсан “100 мянган айлын орон сууц” буюу “Шинэ бүтээн байгуулалт” дунд хугацааны зорилтот хөтөлбөрийг хэрэгжүүлэхдээ дулааны өсөн нэмэгдэж буй хэрэглэгээг эрчим хүчний шинэ эх үүсвэр ДЦС-5 аас хангах юм. Эрчим хүчний тав дахь эх үүсвэр 6 зуух, 5 турбинтай нийт 820 МВт цахилгаан, 1101 Гкалл/цаг дулаан гаргах хүчин чадалтай бөгөөд эхний ээлж 2015 онд, хоёр дахь ээлж 2020 онд ашиглалтанд орно. Төр хувийн хэвшлийн түншлэлийн загварыг ашиглан Улаанбаатарыг нүүрстөрөгчийн бага ялгаралтай эрчим хүчээр хангах энэхүү төслийг Япон улсын Засгийн газар санхүүжүүлэн хэрэгжүүлж байгаа. Үндсэн зорилго нь Улаанбаатар хотын эрчим хүчний хангамжийн аюулгүй, найдвартай байдлыг бүрдүүлэхэд оршино. Мөн нүүрстөрөгчийн бага ялгаралтай дулаан цахилгааны хосолмол үйлдвэрлэлийн /Дулааны цахилгаан станц-5\ станцыг барихад тохирох төслийн загварыг боловсруулаад байна. Дулааны цахилгаан станц-5-ыг Улиастай, Багануур, ТЭЦ-3 орчим гэсэн хувилбараар, барих газрын судалгаа хийснээс ТЭЦ-3-ын орчим барьж одоо байгаа дэд бүтцийг ашиглах боломжтой хэмээн сонгосон байна. ДЦС-5 жилд 3,6 сая тонн нүүрс шатаах бөгөөд нүүрснийхээ 70 хувийг Шивээ-Овоогоос, 30 хувийг нь Багануураас авах бүрэн бололцоотой. Тоосны хаягдлыг 99,6 хувь шүүх бөгөөд үнсээр нь барилгын материал үйлдвэрлэнэ. Үнснээс ялгарах цацраг идэвхт бодис барилгын материалын стандартад нийцэхийг шинжилгээгээр тогтоосон.