Нийслэлийн Байгаль орчны газраас Байгаль орчин, Уур амьсгал өөрчлөлтийн яам, Хот байгуулалт, хотын стандартын газар, Богдхан уулын дархан цаазат газрын хамгаалалтын захиргаа, Горхи Тэрэлжийн байгалийн цогцолборт газрын хамгаалалтын захиргаатай хамтран нийслэлийн нутаг дэвсгэрт хамаарах зуслангийн бүс, улсын тусгай хамгаалалттай газруудад дагаж мөрдөх хашааны стандартын төслийг зэрлэг амьтдад ээлтэй байдлаар шийдвэрлэх ажлыг өнгөрөгч онд эхлүүлэн ажиллаж байгаа билээ. 

Суурьшлын бүсийн тэлэлт, төлөвлөлтгүй газрын олголтоос шалтгаалан зэрлэг амьтдын тархац нутаг хумигдаж, стандартын бус хашаанд сүлбэгдэх, хавчуулагдах тохиолдлууд сүүлийн жилүүдэд нэмэгдэж байгаа бөгөөд 2018-2023 онд нийслэлийн нутаг дэвсгэрт зэрлэг амьтантай холбоотой 388 удаагийн дуудлага мэдээлэл хүлээн авснаас 30 бодгаль туруутан амьтан зуслангийн бүсийн төмөр хашаанд сүлбэгдэн хорогдсон бөгөөд байгаль экологийн үнэлгээгээр 116.142.000 сая төгрөгийн хохирол учирсан байна. 

Тэгвэл дээрх ажлын үр дүн буюу зуслангийн бүсийн хашааны UCS стандартыг Нийслэлийн Иргэдийн Төлөөлөгчдийн Хурлаар баталснаа албан ёсоор мэдэгдлээ. Энэхүү шинэчлэлт нь хотын зуслангийн бүсэд амьдарч буй иргэд, газар эзэмшигчид, барилгачид болон зөвшөөрөл олгох байгууллагуудын ажлыг хөнгөвчлөх, хашаа байгуулах стандарт, аюулгүй байдлыг хангах зорилготой юм.

Шинэ стандартаар зуслангийн хашааны бүтэц, хэмжээ, материал, байршил зэрэг олон үзүүлэлтүүдийг тодорхойлсон бөгөөд энэ нь тухайн бүсийн экологийн тэнцвэрийг хадгалах, аюулгүй байдлыг сайжруулахад чиглэсэн шийдвэр юм. 

Шинэ стандартын дагуу зуслангийн бүсийн хашааны барилгыг зөвшөөрөлгүй барих, стандарт зөрчсөн хашаа байгуулахыг хориглох бөгөөд эдгээр зөрчил гаргасан тохиолдолд хуулийн хариуцлага хүлээлгэхээр болсныг онцлов.