Монгол Улсад барилгын салбар үүсч хөгжсөний 85 жилийн ой энэ жил тохиож байна. Тэртээ 1926 онд “Монголын хувь нийлүүлсэн хоршоо” нэртэйгээр байгуулагдаж байсан тэр үеэс хойш 85 жилийг түүхийн хуудсыг эргүүлжээ.   

    Өнөөдөр Монгол Ньюсийн хэвлэлийн танхимд 85 жилийн ойтой холбоотой үйл ажиллагааныхаа тухай зохион байгууллагчдын зүгээс хэвлэлийнхэнд мэдээлэл өглөө. Хэвлэлийн бага хуралд ГХБГЗЗГ-ын дэд дарга Б. Баярсайхан, ГХБГЗЗГ-ын барилгын чанар, аюулгүй байдлын хэлтсийн дарга Б. Гантулга, Барилга.МН БЗМТөвийн захирал Г. Батсүх, МБХ-ны ерөнхийлөгч     М. Батбаатар, МБҮЭХ-ны дарга Б. Батцогт нар оролцож сэтгүүлчдэд мэдээлэл хийлээ.

     Барилгын салбар үүсч хөгжсөний 85 жилийн ойд зориулан энэ жил нилээн олон томоохон ажлууд зохион байгуулж байгаа бөгөөд  “Барилга- Экспо 2011” олон улсын үзэсгэлэн яармаг, баярт зориулсан улс аймгийн цолтой 128 бөхийн барилдаан гээд олон ажлуудыг зохион байгуулж байна.

    2011 оны 9 сарын 2-ны 11 цагт Барилгачдын талбайд Шилдэг 10 байгууллагын Туг мандуулах Ёслолын ажиллагаа болно.

   9 сарын 2-5-ний хооронд зохион байгуулагдаж байгаа олон улсын үзэсгэлэн яармагт дэлхийд барилгын салбараараа тэргүүлдэг Герман, АНУ, Швейцар, Хонг Конг, Тайвань, Орос, Хятад, Япон зэрэг 10- аад орны компаниуд болон Монголын барилгын компаниуд, банк зээлийн гээд 120 гаруй байгууллагууд өөрсдийн материал, бүтээгдэхүүнээ танилцуулах юм байна.

Мөн 85 жилийн ойд зориулан барилгачдаараа бахархах, тэдний ажлыг олон нийтэд таниулах зорилгоор “Барилгачны алдар” фото зургийн уралдааныг зарлаж, уралдаанд ирсэн бүтээлийг үзэсгэлэнгийн үеэр олон нийтэд дэлгэн үзүүлэх юм байна.

    Энэ удаагийн үзэсгэлэн яармаг өмнөх үзэсгэлэнгүүдээс онцлог болж байгаа бөгөөд монголд анх удаа автомашины хонжвортой сугалааг зарлаж байгаа юм байна. Үзэсгэлэнг үзэхээр хүрэлцэн ирсэн хүн бүр азаа үзэж сугалаанд оролцох боломжтой юм. Үүнээс гадна барилгачдын баярын өдрүүдээр урьд өмнө нь зохиогдож байгаагүй хүндэтгэлийн цуваа Барилгачдын талбайгаас эхлэн Мишээл Экспо, Бөхийн өргөө гэсэн маршрутаар явах юм байна.

    Үзэсгэлэн яармагийг ЗТБХБЯ, ГХГЗЗГ, болон МБХ, “Барилга.МН БЗМТөв”, МБҮЭ, МБИХ зэрэг төрийн болон төрийн бус байгууллагууд хамтран зохион байгуулж байгаа бөгөөд “Барилга- Экспо 2011” үзэсгэлэн яармагийн ерөнхий ивээн тэтгэгчээр “Номин Констракшн” ХХК ажиллаж байгаа бол ивээн тэтгэгчээр “Топ чанар” групп, хэвлэлийн ивээн тэтгэгчээр “Зар мэдээ.МН”, Шуурхай зар, Боловсрол суваг телевиз, хэвлэлийн ивээн тэтгэгчээр “Orange design” LLC зэрэг байгууллагууд оролцож байна.

 

    2011 оны 9 сарын 2-ны 15 цагт Барилгын салбар үүсч хөгжсөний 85 жилийн ойн  баярын ёслолын ажиллагаа, улс аймгийн цолтой 128 бөхийн барилдаан болно. Ерөнхий ивээн тэтгэгчээр 5 жилийнхээ ойг тэмдэглэж байгаа "Их үйлсийн эрэлд" ХХК-ийнхан оролцож байна.