Барилгын салбар үүсч хөгжсөний 85 жилийн ойд зориулан энэ жил нилээн олон томоохон ажлууд зохион байгуулж байгаа бөгөөд  “Барилга- Экспо 2011” олон улсын үзэсгэлэн яармаг, баярт зориулсан улс аймгийн цолтой 128 бөхийн барилдаан гээд олон ажлуудыг зохион байгуулж байна. “Анхны Монголын хувь нийлүүлсэн хоршоо” гэсэн нэртэй үүсэн байгуулагдаж байсан байгууллага 85 жилийнхээ ойн босгон дээр салбарынхаа “Шилдэг 10” байгууллагыг үйл ажиллагааных нь чиглэлээр шилдгээр шалгарууллаа. Шилдэгүүдийн туг мандуулах ёслолын ажиллагааг 2011 оны 09 сарын 2-ны 11 цагт Барилгачдын талбайд зохион байгуулах юм байна.

     Барилгын салбар үүсч хөгжсөний 85 жилд зориулан гаргаж байгаа “Барилга Экспо 2011” олон улсын үзэсгэлэн яармаг нь 09 сарын 2-5-ний хооронд зохион байгуулагдаж байгаа бөгөөд энэхүү үзэсгэлэнд дэлхийд барилгын салбараараа тэргүүлдэг Герман, АНУ, Швейцар, Хонг Конг, Тайвань, Орос, Хятад, Япон зэрэг 10- аад орны компаниуд болон Монголын барилгын компаниуд, банк зээлийн гээд 120 гаруй байгууллагууд өөрсдийн материал, бүтээгдэхүүнээ танилцуулах юм байна.

     “Барилга Экспо 2011” олон улсын үзэсгэлэн яармагт хүрэлцэн ирсэн хүн бүрийг бүртгэх бөгөөд бүртгэлд хамрагдсан хүн бүр автомашины хонжвортой сугалаанд оролцох юм байна.

     Мөн 85 жилийн ойд зориулан барилгачдаараа бахархах, тэдний ажлыг олон нийтэд таниулах зорилгоор “Барилгачны алдар” фото зургийн уралдааныг зарлаж, уралдаанд ирсэн бүтээлийг “Барилга Экспо-2011” үзэсгэлэнгийн үеэр олон нийтэд дэлгэн үзүүлэх юм байна. Фото зургийн уралдааны ерөнхий зохион байгуулагчаар Барилга.МН БЗМТөв, хамтран зохион байгуулагчаар INET гэрэл зургийн студи ажиллаж байна.

    Энэ удаагийн үзэсгэлэн яармаг өмнөх үзэсгэлэнгүүдээс онцлог болж байгаа бөгөөд монголд анх удаа автомашины хонжвортой сугалааг зарлаж байгаа юм байна. Үзэсгэлэнг үзэхээр хүрэлцэн ирсэн хүн бүр азаа үзэж сугалаанд оролцох боломжтой юм. Үүнээс гадна барилгачдын баярын өдрүүдээр урьд өмнө нь зохиогдож байгаагүй хүндэтгэлийн цуваа Барилгачдын талбайгаас эхлэн Мишээл Экспо, Бөхийн өргөө гэсэн маршрутаар явах юм байна.

     Үзэсгэлэн яармагийг ЗТБХБЯ, ГХГЗЗГ, болон МБХ, “Барилга.МН БЗМТөв”, МБҮЭ, МБИХ зэрэг төрийн болон төрийн бус байгууллагууд хамтран зохион байгуулж байгаа бөгөөд “Барилга- Экспо 2011” үзэсгэлэн яармагийн ерөнхий ивээн тэтгэгчээр “Номин Констракшн” ХХК ажиллаж байгаа бол ивээн тэтгэгчээр “Топ чанар” групп, хэвлэлийн ивээн тэтгэгчээр “Zarmedee.mn”, Шуурхай зар, Боловсрол суваг телевиз, хэвлэлийн ивээн тэтгэгчээр “Orange design” LLC зэрэг байгууллагууд оролцож байна.

     Мөн 2011 оны 9 сарын 2-ны 15 цагт Барилгын салбар үүсч хөгжсөний 85 жилийн ойн  баярын ёслолын ажиллагаа, улс аймгийн цолтой 128 бөхийн барилдаан болно. Ерөнхий ивээн тэтгэгчээр 5 жилийнхээ ойг тэмдэглэж байгаа "Их үйлсийн эрэлд" ХХК-ийнхан оролцож байна.

 Монгол Улсад барилгын салбар үүсч хөгжсөний 85 жилийн ойн баяр,

2011 оны 9-р сарын 2-ны өдрийн хөтөлбөр