Ажлаасаа ирээд гэр бүлийнхэнтэйгээ тухлан сууж ярилцах хэсэг бол яалт ч үгүй тав тухтай буйдан байдаг. Тэгвэл тэрхүү буйданг сүүлийн үеийн шинэлэг загвараар гар доорх материал ашиглан хийх зааврыг танд хүргэж байна. Гэхдээ хамгийн гол нь машины дугуйг гол материалаа болгон ашиглаад зураг дээрх шиг загварлаг чамин буйданг бүтээнэ. Бүтээлч гэрийн эзэгтэй нартаа зориулахын зэрэгцээ гэргийгээ үргэлж дэмждэг халамжит нөхөрт нь хамтран хийхийг санал болгож байна. Гэрийг тань чимэх бас нэгэн гайхалтай хэсэг байх болно гэдэгт итгэлтэй байна. 

Ашиглагдах материал 

    ●    Машины дугуй 

    ●    Фанер

    ●    Сайн чанарын цавуу

    ●    Порлон

    ●    Үдээсний машин 

    ●    Метр 

    ●    Хайч

    ●    Хамбан давуу

    ●    Илгэн товч  

    ●    Шруп 

    ●    Дрилл 

    ●    Алх 

    ●    Буйдангийн бэлэн хөл 

    1.    Юуны түрүүнд тохирох хэмжээний машины хуучин дугуйгаа цэвэрлэж бэлтгэнэ. Түүний дараа доторх дугуйд тохирсон фанераа дугуй хэлбэртэйгээр хөрөөднө. Ийнхүү дугуйнынхаа нэг талд бэлтгэсэн дугуй хэлбэртэй фанераа дрилл ашиглан шрупдэнэ.

    2.   Түүнийхээ дараа дугуйныхаа нэг талыг порлоноор битүүлэн цавуудах ба мөн дугуйнхаа хажуу талд порлоноо цавуудан тогтооно. Тухайн порлоныхоо зузаан нимгэнийг сонгохдоо өөрийн тухлан суух буйдангаа бодолцон үзээд сонгохыг зөвлөж байна. Сайн чанарын порлон байх тусмаа эдэлгээ сайн гэдгийг битгий мартаарай. 

3.  Буйдангаа илүү загварлаг, чамин болгохын тулд нүхтэй байдлаар загварчилъя. Ингэхийн тулд хоорондын зай адилхан байхаар хэмжиж нүх хийх газраа порлон дээрээ тэмдэглэнэ. Хоорондын зай 4см байвал зохино. Тэмдэглэсэн газраа хайчаар дөрвөлжилсөн жижиг хэмжээтэй байхаар тооцоолон порлоноо хайчилна. Тухайн хайчилсан зайнд эхэнд бэлтгэсэн илгэн товчоо шигтгэн өгөх учиртай юм шүү. 

4. Буйдангийнхаа өнгийг сонгохдоо гэрийнхээ интерьерт тохирсон хамгийн зөв өнгийг сонгон давуугаа бэлтгээрэй. Энэ төрлийн чамин буйданг хамбан материалаар хийх нь хамгийн тохиромжтой болохыг зөвлөж байна.

5. Буйдангийнхаа хэмжээнд тааруулан сонгон давуугаа ороон гаргасан нүх болгон руугаа оруулан хамбан товчоо шигтэн нааж болно. Эсвэл илүү бат бөх байлгах үүднээс утсаар тогтоож оёж болно. Ингэснээр зөвхөн суух хэсэг л бүтэж байна. 

6. Буйдангаа давуугаараа бүрсний дараа буйдангийн хэмжээнээс давуу илүү гарч болно. Үүнийг та бүү хайчлаарай. Доод сууринд нь бэхлэн тогтоох нь хамгийн зөв арга байх болно. Ингэснээр удаан эдэлгээтэй байх нэг үндсийг бий болгоно. 

7. 24 см урттай, 6см өргөнтэй 15ширхэг мод бэлтгэн ар хэсгийг хийцгээе. Тэдгээр модыг дугуйтайгаа дрилл ашиглан шрупдэж тогтооно.

8. Илүү цэвэрхэн болгох үүднээс нарийн фанераар 2 талыг бүрж болно. Энэ нь порлоныг тогтооход хялбархан болгоно.  Ингээд мөн зөөлөн порлоноо фанер дээрээ цавуудан бүрнэ. Нуруу хэсэгт байрлах порлог учраас зузаан байсандаа буруудахгүй шүү. 

9. Буйдангийн суурь хэсгийг хийсэн шигээ порлоноо нүхлэн илүү чамин загварчлалыг бүтээнэ. 

10. Гаргасан нүхэндээ хамбан товчоо шигтгэн тогтооно. Товчийг амархан унахаас сэргийлж оёож тогтоож болно шүү. 

11. Буйдангийн давуунаас илүү гарсан хэсгийг хайчлалгүй цэвэрхэн нугалаад тогтоогоорой. 

12. Энэ үед буйдангийнхаа их биений арыг болон сууриа сонгосон давуугаараа бүрнэ. Дараа нь бэлэн зарагддаг хөлөө тогтоон байрлуулна. Тухайн буйдангийн загварлаг, чамин байдлыг алдагдуулалгүй бага хэмжээний урттай хөл сонгохыг зөвлөж байна.

13. Ингээд бид машины хуучин дугуйг чамин загварлаг буйдан болголоо. Хэрвээ та зааврыг илүү дэлгэрэнгүй бичлэгээр үзэж болно. Танд амжилт хүсье. 

Зааврыг бичлэгээр үзэх бол==> ЭНД ДАРНА УУ