Нийслэлд энэ онд шинээр болон, шинэчлэгдэх 76 км зам бий бөгөөд Авто замын газраас нийт 46 төсөл хэрэгжүүлж байгаа юм. Зам засварын ажилд зориулж 67 орчим тэрбум төгрөгийн хөрөнгө оруулалт хийжээ. Нийт 76 км авто зам барихаар төлөвлөсөн байна. Зам барилгын ажлыг гүйцэтгэгч компаниуд 60 км замыг ирэх намар хүлээлгэж өгөхөөр гэрээгээ хийжээ. Залуучуудын өргөн чөлөө, бага тойруугийн нийт 20 чиглэлд зам засвар хийгдэх төлөвлөгөө гарч, Улаанбаатар хотын ерөнхий менежер баталсан. Түүнчлэн НЗДТГ-аас өмнөх жилүүдэд чанаргүй зассаны улмаас эвдэрч хагарсан замуудыг гүйцэтгэгчээр нь засуулах болсон юм. Жишээлэхэд өнгөрсөн жил “100 айл”-ын замыг шинээр тавьсан ч хагарч эвдэрсэн байгаа. Тэр замыг засахыг гүйцэтгэгчээс нь шаардсаны дагуу засварын ажил энэ жил засвар хийгдэнэ. Энэ мэт алдаанаас үндэслэн энэ жилийн замын засварыг хийх компаниудтай дараа нь гарсан эвдрэлийг өөрсдөөр нь засуулахаар гэрээлжээ. Энэ жилийн зам засварын гол ажил бол зүүн дөрвөн замаас баруун дөрвөн зам хүртэлх замын ачааллыг бууруулж, хөдөлгөөний нэвтрүүлэх чадварыг нэмэгдүүлэх зорилгоор Их сургуулийн гудамж, Олимпийн гудамжны уулзварыг нэгтгэж дөрвөн замын уулзвар болгосон билээ. Мөн Сүхбаатарын талбайг тойрсон замыг хоёр урсгалтай болгосон. Засварт орсон замуудын явган хүний замыг Чингэлтэй болон Сvхбаатар дүүргийн ТVК-иуд хариуцаж хийж байна. Одоо үлдсэн ажил болох хашлагын гагнаас болон хог хаягдлыг зайлуулах ажил хийгдэх бөгөөд хотын төв орчмын зам засварын ажил дуусчээ. Одоогоор Авто замын 22-ын товчоо чиглэлийн 10.6 км авто замын ажлын хүрээнд Таван шарын гармаас Сонсголонгийн уулзвар хүртэл цахилгаан, холбооны шугамын шилжүүлэх ажил болон уурын компенсатор хүчитгэх ажил, төмөр замын 2 гармын өргөтгөлийн ажлууд бүрэн хийгдэж дууссан байна. Таван шарын уулзварын өргөтгөлийн хучилтын ажил бүрэн хийгдсэн бөгөөд 22-ын товчооноос цааш 4.3 км замыг хааж түр зам гарган, 5 цэгт ус зайлуулах төмөрбетон 4 хоолой, 1 дөрвөлжин хоолой байрлуулах ажил хийгдсэн байна. Төмөр замын 396-р гармаас Сонсголонгийн уулзвар хүртэлх 1.0 км замын гэрэлтүүлгийн холболт, хашлага суурилуулах ажил хийгдэж байгаа юм байна. Нийт замын уртад далангийн дүүргэлт, дөрвөлжин хоолой угсралтын ажил хийгдэж байгаа бөгөөд ажлын явц 45 хувьтай байгаа аж. Мөн Сансарын ШТС-аас Дамбадаржаа хүртэлх 6.7 км авто замын ажил ид өрнөж байна. Нийслэлийн Газрын Албатай хамтран 86 айлын газар чөлөөлөхөөс 79 айлын газрыг чөлөөлсөн бөгөөд зорчих хэсгийн өргөсгөх 1 м хэсгийн суурийн ажил хийж гүйцэтгэсэн аж. Техникийн нөхцлийн дагуу инженерийн шугам сүлжээний ажил бүрэн дуусчээ. Нийслэлийн замын сангийн хөрөнгө оруулалтаар хотын доторх 59 гудамж замд 1.25 тэрбум төгрөгийн 28098 м2 нөхөөс, 131500 урт метр заадас засварын ажил хийхээр жагсаалт гаргасан. Батлагдсан ажлуудыг 12 багц болгон нээлттэй тендерт шалгарсан есөн байгууллагатай 1.17 тэрбум төгрөгийн гэрээ байгуулан гүйцэтгэсэн байна. Түүнчлэн төвийн зургаан дүүргийн орон сууцны хороолол доторх 11.28 км 17 авто замын шинэчлэлтийн ажлыг 11 багц болгон гүйцэтгүүлэхээр 10 байгууллагатай нийт 3.14 тэрбум төгрөгийн гэрээ байгуулан ажиллаж байгаа юм. Хороолол дундах замуудын засварын ажил үндсэндээ дууссан байна. Тухайлбал Хан-Уул дүүргийн Оргил рашаан сувилал орчмын орон сууцны хороолол доторх 0.9 км зам, Сүхбаатар дүүргийн 1,2 дугаар хорооны орон сууцны хорооллын 0.8 км зам, Сонгинохайрхан дүүргийн таван шарын хороолол доторх 1.1 км зам, Нэгдүгээр амаржих газрын урд талын 0.4 км зам зэргийг бүрэн шинэчилж дуусчээ. Харин Баянзүрх дүүргийн Улиастайн эцсийн буудлын зогсоолын талбайн шинэчлэлт 20 хувь, тус дүүргийн нэгдсэн эмнэлэг орчмын 0.6 км зам, зургадугаар хороо Оюутны хотхоны орчмын 1.0 км, 14 дүгээр хорооллын доторх 0.2 км замын шинэчлэлийн ажил 90 хувьд хүрээд байгаа аж. Н.Гантуяа