Барилга, хот байгуулалтын сайдын 45 дугаар тушаалаар байгуулагдсан “Барилгын гол нэр төрлийн материал болох арматур, бетон зуурмаг, бетон эдлэлийн үйлдвэрийн бүтээгдэхүүний чанар, үйл ажиллагаанд хяналт, шалгалт хийх ажлын хэсэг” - ийн арматур үйлдвэрлэгч аж ахуйн нэгж, байгууллагуудад хийсэн хяналт, шалгалтын дүнгийн талаар БХБЯ - ны Барилгын материалын үйлдвэрлэлийн хэлтсийн дарга Д.Батзориг танилцууллаа.        

Монгол Улсад Барилгын арматурын 16 үйлдвэр байдаг бөгөөд дээрх ажлын хэсэг нь үйл ажиллагаа нь явагдаж байгаа 10 үйлдвэр дээр хяналт, шалгалтыг зохион байгуулаад байна. 

Тус ажлын хэсгийн шалгалтаар “Лэл минерал” ХХК - ийн үйлдвэрийг түрээслэн ажиллуулж буй “Мэлон гүүд трейдинг” ГХОХХК, “Синвоюань” ГХОХХК нарын үйлдвэрлэж буй арматур болон үйл ажиллагаа нь дараах нийтлэг шаардлага болон хууль зөрчиж үйл ажиллагаа явуулсан нь тогтоогдсон. Үүнд: 

• Барилгын тухай хуулийн 19.1.4 - д дагуу тусгай зөвшөөрөл байхгүй 
• Барилгын тухай хуулийн 43.1.4 - д заасны дагуу технологийн заавар, тохирлын гэрчилгээ байхгүй 
• Барилгын тухай хуулийн 43.1.7 лабораторийн хэмжих хэрэгсэл, тоног төхөөрөмжийг баталгаажуулаагүй 
• Үйлдвэрлэсэн бүтээгдэхүүн урсалтын болон бөхийн хязгаар хангаагүй 
• Мөн “Синвоюань” ГХОХХК - ийн хувьд арматурын шошго зүүлт нь гаднаас харахад Хятад арматурын шошготой ижил, хэрэглэгчдийг төөрөгдүүлэх, хууран мэхлэх шинж агуулсан. 
• Барилгын тухай хуулийн 43.1.5 - д заасны дагуу үйлдвэрлэсэн “барилгын материал, бүтээгдэхүүнийхээ чанарын үндсэн үзүүлэлтийг тодорхойлох лабораторитой байх, хяналт тавих” гэж заасны дагуу эрүүл ахуйн болон дотоод лабораторийн шаардлага хангагдаагүй 
• Үйлдвэрийн талбайн гадна болон дотор талд самбар болон ХАБЭА -н тэмдэг, тэмдэглэгээ байхгүй, дутуу 
• Ажлын байр болон ажилчдын түр амьдрах байх эрүүл ахуйн шаардлага хангаагүй зэрэг нийтлэг зөрчлүүд илэрсэн байна 

Тиймээс дэрх ААНБ - уудын чанарын шаардлага хангаагүй арматурыг дахин боловсруулах, зөрчлийн хэрэг үүсгэх, тусгай зөвшөөрлийг цуцлах хүртэл арга хэмжээ авах талаар мэдэгдлээ.