Барилга, хот байгуулалтын сайд Данийн Хаант Улсаас БНХАУ-д суугаа Элчин сайдыг хүлээн авч уулзлаа
Барилга, хот байгуулалтын сайд Данийн Хаант Улсаас БНХАУ-д суугаа Элчин сайд Томас Өстрип Мөллерийг /2023.04.03/ хүлээн авч уулзлаа.
Уулзалтаар сайд Ц.Даваасүрэн Монгол Улсын өнөөгийн эрчим хүчний хэт их ачаалал, цаашид үүсэж болзошгүй эрсдэлийн талаар Данийн элчин сайдад товч мэдээлэл өглөө. Мөн Дани Улсын нарны эрчим хүч, биомассын үйлдвэрээс гарсан илүүдэл дулаан, салхин сэнс зэрэг сэргээгдэх эрчим хүчний эх үүсвэрээр ус халаах, дулаан нөөцлөх тоног төхөөрөмж ашиглан хэрэглэгчдийг дулааны эрчим хүчээр хангах технологийн талаар талууд санал солилцов. Түүнчлэн хэт ачааллын үед энэхүү технологийг ашиглан Улаабаатар хотын гэр хорооллын дулааны эрчим хүчний чадлыг нэмэгдүүлж, хэрэглэгчдийг дулаанаар хангах шийдлүүдийн талаар ярилцав.
Барилга, хот байгуулалтын сайд мөн 2023 оны 03-р сард Данийн Хаант улсад хийсэн айлчлалын үед тус улсын хэсэгчилсэн инженерийн дэд бүтцийн технологийг хөгжүүлж, тус улсад хэрэгжүүлж байгаа төрийн байгууллага, төрийн бус байгууллага холбоод, хувийн аж ахуйн нэгж болон эрдэмтэдтэй уулзалт хийж, хэрэгжүүлсэн төслүүдтэй газар дээр нь биечлэн танилцсан ба Дани Улсын энэ чиглэлийн технологийн хөгжил дэлхийд тэргүүлэх өндөр түвшинд хүрсэн байгааг онцлов.
Уулзалтын үр дүнд цаашид Монгол Улс төвлөрсөн инженерийн эх үүсвэрт холбоход хүндрэлтэй байгаа Улаанбаатар хотын гэр хороолол, орон нутгийн дулаан хангамжид тулгарч буй асуудлыг даван туулах, инженерийн оновчтой шийдлээр сэргээгдэх эрчим хүчний эх үүсвэрийг түлхүү ашиглах, мөн сэргээгдэх эрчим хүчний эх үүсвэрийг ашигласан техник, технологийг нэвтрүүлэх чиглэлээр Данийн Хант Улстай хамтын ажиллагаагаа өргөжүүлж, төсөл, хөтөлбөр хамтран хэрэгжүүлэх чиглэлд талууд санал нэгдлээ.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.